Sooq una aamma una sooq?
Apererusussutsip IA Demokraatillu avissaaqqatippai
Inuit Ataqatigiit Demokraatillu paragraf 37 naapertorlugu apeqquteqartarnermut isumaat assortuupput
Ukioq manna paragraf 37 naapertorlugu apeqqutit normu 100-ssaat Naalakkersuisunut aapriilip qulingiluaani apuuppoq.
Tamannalu Demokraatit sinnerlugit Inatsisartuni ilaasortap Michael Rosingip paragraf 37 naapertorlugu, paragraf 37 naapertorlugu apeqquteqartoqartarneranut apeqquteqaateqarneranik kinguneqarpoq.
- Naalakkersuisut takussutissaqartinnerlugu 2015-mi paragraf 37 naapertorlugu Inatsisartuni ilaasortat apeqqutaannut allaffissornermi aningaasatigullu ulloq manna tikillugu qanoq aningaasartuutit amerlatigisut atorneqarsimanersut?
Taama Michael Rosing apeqquteqaateqarpoq. Taassuma aamma ilanngullugu tusarusuppaa Naalakkersuisut akissuteqarnerminnut ilanngullugu eqqarsaatigisinnaaneraat apeqqutit pineqartut akinerannut Namminersorlutik Oqartussat qanoq aningaasartuuteqartarnersut.
- Paragraf 37 naapertorlugu apeqqutit Inatsisartuni ilaasortat sakkussaraat paasissutissanik piniarnerminni, aamma naliginnaavoq illuatungiliuttut partiivi amerlanerusunik apeqquteqartarnerat. Taamaattumik apeqqutit amerlassusaat imaluunniit agguagaanerat ippinnartortaqanngilaq, Michael Rosing allappoq.
Nangipporlu:
- Taamaakkaluartorli ilaanneeriarlunga amigaatigisarpara ilaasortat ataasiakkaat imminnut aperisarnissaat: Nammineerlunga apeqqummi tassani akissutissaq ujarsimasinnaanngikkaluarpara? Imaluunniit apeqqutigisannut akissut politikkikkut sulininni sumut atorsinnaavara?
Politikerit imminnut nittarsaakkusuttut
Michael Rosingimmi isumaa naapertorlugu ilaannikkut allaaneq ajorpoq politikerit ataasiakkaat apeqquteqartartut taamaallaat tusagassiorfinni taaneqalaarnissartik piinnarlugu apeqquteqartartut. Imaluunniit apeqquteqartup qinersisiminut takutinnialaaginnartaraa sulilersimanini.
- Tassani Demokraatini isumaqarpugut, pissusissamisuussagaluartoq Naalakkersuisut akissuteqarangaamik naggataatigut ilaannguttalertuuppassuk apeqqutip akiniarneranut qanoq aningaasartuuteqartoqartarnersoq, taamaasilluni ersarinnerulissagaluarpoq demokrateeqarneq qannoq akeqarnersoq.
IA: Demokrati annertunerusoq – annikinnerusuunngitsoq
Nunatsinni partiit illuatungiliuttut annersaat tupinnanngitsumik paragraf 37 naapertorlugu amerlanerpaanik apeqquteqarsimasoq, Demokraatit apeqquteqaataannut tupigusulluinnarput.
- Inuit Ataqatigiinni ilaasortat ‘asuli aperiniaannarlutik’ apeqquteqarneq ajorput. Apeqqutit politikkikkut pisat pingaaruteqartut erseqqissarneqarnissaannut paasissutissanullu pisinnaanngikkaluatsinnut paasisaqarnissatsinnut apeqqutigineqartarput. Inatsisartuni ilaasortat Naalakkersuisunut apeqquteqarsinnaatitaanerat demakrati tunngavigalugu ingerlatsinitsinni tunngaviulluinnarpoq, Naaja H. Nathanielsen, Inuit Ataqatigiinni politikkikkut oqaaseqartartoq taama allappoq.
Taarsiullugu Inuit Ataqatigiit siunnersuutigaat Naalakkersuisut ammartariaqartut sulianullu tunngatillugu matoqqavallaarunnaartariaqarlutik.
- Tassa imaappoq Naalakkersuisut namminneerlutik paasissutissanik avitseqatigisalissagaatigut – aperineqarnissartik utaqqeqqaarnagu. Taamatuttaaq Naalakkersuisut tusagassiutit, kattuffiit innuttaasullu saaffiginnissutaannut akissuteqartalertariaqarput, Inuit Ataqatigiit taama allapput.