Apeqqutit
Apeqqutinik akissuteqartoq: Demokraatinit Randi Vestergaard Evaldsen
Folketingimut qinigassanngortittut katillugit 17-iusut tamarmik apeqqutinik akinisaqarnissamik periarfissinneqarput. Demokraatinit Randi Vestergaard Evaldsen apeqqutit akivai
Sermitsiaq.AG-mi atuartartut arlaqartut Folketingimut qineqqusaartunut apeqquteqarput. Apeqqutit pitsaanerpaat aaqqissuisoqarfimmit toqqarneqarput.
Qineqqusaartut apeqqutit akisimalereeraangassuk nittartakkamut saqqummiunneqartassapput. Isumaqatigiissutaareersumit akissutigineqartut takinaarneqarsimagaangata akissutaat naalisarneqartassapput.
- Kina statsministerissatut toqqarpiuk?
- Kalaallit soqutigisaannut kina suleqataarusunnersoq apeqqutaavoq (akissut naalineqarpoq)
- Periarfissinneqaruit Namminersornermut isumaqatigiissut nutarterusussaviuk? (Aap imaluunniit naamik)
- Naamik. Tamanna innuttaasut 2009-mi aalajangerfigereerpaat (akissut naalineqarpoq)
- Danmarki sorsunnernut assigiinngitsunut iluatsiffiunngitsunut peqataasareerpoq. Naalagaaffeqatigiinnermi illersornissamut politikkikkut Kalaallit Nunaat sunniuteqaqataanerussava? (Aap imaluunniit naamik)
- Kalaallit Nunaata Folketingip nunanut allanut politikkeqarnermut ataatsimiititaliaani issiatitaqarnissaa pingaaruteqarpoq. (Akissut naalineqarpoq)
- Kalaallit ilinniarluarsimasut Danmarkimi najugaqartuusut qanoq angerlartinneqassappat?
- Inissiat amerlanerulertariaqarput (ingammik Nuummi), pitsaanerumik meeqqanut paaqqinnittarfeqartariaqarpoq, atuarfiit pitsaanerulertariaqarput, utertut akuersaarneqarnerusariaqarput aamma inuussutissarsiorfiit suleqatigineqarluarnerusariaqarput (akissut naalineqarpoq)
- Kalaallit Danmarkimi najugaqartunut pitsaanerusumik sullissisoqassava?
- Inuit pisariaqartitaat aallaavigalugit sullinneqarsinnaasariaqarput (akissut naalineqarpoq)
- Naalagaaffeqatigiinnermi killeqarfitsigut aporfiit atorunnaarsinneqassappat? (Aap imaluunniit naamik) aamma suut peerneqarnissaat illit pingaarnerpaatippiuk?
- Aporfiusinnaasut tamarmik sulissutigineqartariaqarput (akissut naalineqarpoq)
- Naalagaaffeqatigiinneq ineriartorteqqinneqassava? (Aap imalluunnit naamik) Qanoq?
- Naalagaaffeqatigiinnermi qanimut suleqatigiinneq uterteqqikkusuppara. Danskit oqaloqatigerusuppakka, kikkulluunniit naligiimmik isigineqarnissaat anguniarniarpara (akissut naalineqarpoq)
Folketingimut isissagaluaruit Inatsisartuni sulinngiffeqarnissat qinnutigissaviuk? (Aap imaluunniit naami) marloqiusamik ilaasortaaffeqartarneq qanoq isumaqarfigaajuk?
- Innuttaasut ikittuararsuupput, taamaammat marloqiusamik ilaasortaatitaqarneq ajorinngilara. Folketingimut isissaguma Inatsisartunit sulinngiffeqarnissara qinnuteqaatigissavara (akissut naalineqarpoq)
- Aleqa Hammondip Folketingimut qineqqusaarnera pissusissamisoorpa? (Aap imaluunniit naamik)
- Siumup aalajangigai isummersorfigissanngilakka. Tamanna innuttaasut aalajangiiffiugiumaarpaat.