Apeqqutit

Apeqqutinik akissuteqartoq: Atassummut Steen Lynge

Folketingimut qinigassanngortittut katillugit 17-iusut tamarmik apeqqutinik akinisaqarnissamik periarfissinneqarput. Atassummit Steen Lynge apeqqutinik akissuteqarpoq

Atassut sinnerlugu Folketingimut qinigassanngortittoq Steen Lynge

Sermitsiaq.AG-mi atuartartut arlaqartut Folketingimut qineqqusaartunut apeqquteqarput. Apeqqutit pitsaanerpaat aaqqissuisoqarfimmit toqqarneqarput.

Qineqqusaartut apeqqutit akisimalereeraangassuk nittartakkamut saqqummiunneqartassapput. Isumaqatigiissutaareersumit akissutigineqartut takinaarneqarsimagaangata akissutaat naalisarneqartassapput.

Kina statsministerissatut toqqarpiuk?

- Lars Løkke Rasmussen, Venstre.

Periarfissinneqaruit Namminersornermut isumaqatigiissut nutarterusussaviuk? (Aap imaluunniit naamik)

- Naamik. Kissaat kisimi Inatsisartunit/Naalakkersuisunit qaqilerneqarsinnaavoq.

Danmarki sorsunnernut assigiinngitsunut iluatsiffiunngitsunut peqataasareerpoq. Naalagaaffeqatigiinnermi illersornissamut politikkikkut Kalaallit Nunaat sunniuteqaqataanerussava? (Aap imaluunniit naamik)

- Nunatta Folketing-imi ilaasortaatitaat ataaseq pinngitsoorani Illersornermut Nunanullu allanut ataatsimiitsitaliani aaliangersimasumik ilaasortaatitaqartalernissaa pisariaqarpoq, taamaammat aap isummersoqataasalernissaq pisussaaffiussaaq.

Kalaallit ilinniarluarsimasut Danmarkimi najugaqartuusut qanoq angerlartinneqassappat?

- Inatsisartut tunngaviusumik nunatsinni inuuniarnermi sinaakkutit pitsaasut pilersissallugit akisussaaffigaat, taamaakkaluartoq ilinniartut nunatsinnilu suliffeqarfiik akornanni attaveqatigiittarneq suli pitsanngorsartuassavarput, taamaaliornikkut ilinniartut nunatsinnut attaveqarnerat pitsaasuuppat uternissaat pilerinarnerulissammat.

Kalaallit Danmarkimi najugaqartunut pitsaanerusumik sullissisoqassava?

- Naalagaaffeqatigiit akornanni nuuttarneq ajornannginnerusariaqarpoq aammalu akuulersitsinissamut suliniutit pitsaanerusut pilersinneqartariaqarput (akissut naalineqarpoq)

Naalagaaffeqatigiinnermi killeqarfitsigut aporfiit atorunnaarsinneqassappat? (Aap imaluunniit naamik) aamma suut peerneqarnissaat illit pingaarnerpaatippiuk?

- Nunat naalagaaffeqatigiit akornanni nuuttarneq ajornannginnerusariaqarpoq aammalu atugassat assigiinnerunissaat anguneqartariaqarpoq.

Naalagaaffeqatigiinneq ineriartorteqqinneqassava? (Aap imalluunnit naamik) Qanoq?

- Tamanut angusaqarfiusumik pitsaasumillu suleqatigiinneq atorneqartariaqarpoq aamma siunissammi pituttorsimannginnerusumik attaveeqatigiinneq siunniunneqarsimagaluarpat.

Folketingimut isissagaluaruit Inatsisartuni sulinngiffeqarnissat qinnutigissaviuk? (Aap imaluunniit naami) marloqiusamik ilaasortaaffeqartarneq qanoq isumaqarfigaajuk?

- Pingaaruteqarpoq Folketing-imi najuuttuarnikkut sulinissaq, taamaammat aap Inatsisartunit sulinngiffeqassaanga qinigaaguma.

Aleqa Hammondip Folketingimut qineqqusaarnera pissusissamisoorpa? (Aap imaluunniit naamik)

- Siumumit aalajangiunneqartuuvoq, tamannalu qinersisartut nalilissavaat.

Powered by Labrador CMS