Piiaaffiit
Anorthosit-mik piiaaffissami Kalaallit aningaasaleeqataasut
Hudson Ressourcemut aktiaataanik pisineq aningaasaliilluarnertut Greenland Venturep nalilerpaa.
Greenland Venture Hudson Resources-ip aktiaataanik 20 mio koruunit naliganut pisivoq.
- Aningaasaliineq pitsaasutut isigaarput pitsaalluinnartumik ineriartornissamut periarfissalik, Per Buhl Olsen Greenland Venturemeersoq, Sermitsiaq.AG-mut oqarpoq.
Greenland Ventures aktianik 20 mio koruunit naliganut pisinermigut piginneqataassusaat 5 – 6 procentit missaaniilerpoq. Aktialli naligat annertusiartorpoq.
Atuaruk: Hudson: - Suliarput tulluusimaarutigaarput
Per Buhl Olseni, Hudson Greenland A/S siulersuisuuneranni ilaasortaavoq.
- Piginneqataaffiup piaasussup siulersuisuini peqataanerput takussutissaavoq suleqataalluni piginneqataanertut, Greenland Venturerip pisortaanera, Karsten Høy oqarpoq.
Eqqarsaatigilluakkamillu aningaasaliineruvoq. Aningaasaliisartummi nunani allaneersut kissaatigisimavaat Nunatsinneersunik piiaaffinni peqataasoqarnissaa.
- Aningaasaliisartummi aperisinnaapput, suliuniutinut sooq aningaasaleqataasimannginnersugut? Upperinngilisiuk?, Per Buhl Olsen oqarpoq.
Anorthosit-imik piiaaffissap, Aappaluttumi rubinisiorfik angeqqatipajaarivaa, tamannalu Greenland Venturep peqataffigisinnaavaa.
Tamannalu pissutigalugu suliniutinut taakkununnga marlunnut aningaasaleeqataapput.
Maanna Hudson Ressources aningaasaliiffigineqallattaarpoq taamaasillutik Kangerlussuarmi piiaffissap suliarineqarnera ingerlalluarsinnaalerpaat.
Suliffeqarfiup nalunaarutiginikuua piiaaffissaq ukioq ataaseq affarlu qaangiuppat piiavik aallartereersimassasoq.
Anorthositimi piiaanissami ilaatigut glasfiberiliorfiussaaq, qalipaasiorfiussaaq alumiiniuliorfiullunilu.