silarluppoq
Anorlernera pissutaalluni silaannakkut timmisartuussinissat eqqorneqarput
Nuummiit Nuummullu ullumikkut aqagulu timmisartuussinissat marlunngornermi taamaatiinnarneqarput. Nunatta kujataani avannaanilu timmisartuussinissat kinguaattoorfiussasut Air Greenlandimit naatsorsuutigineqarpoq
Nuummi Qinngorpumi pisariaqavitsinnagu biilertoqannginnissaa politiinit kajumissaatigineqarpoq marlunngornerup ullaata tungaani. Sila pissutaalluni aamma silaannakkut timmisartuussinissat eqqorneqassasut Air Greenlandimit nalunaarutigineqarpoq.
- Nuummi ulluni makkunani anorersuarnera timmisartuussinissanik ajornartorsiortitsivoq. Ippassaq, ataasinngornermi apriilip ulluisa 13-ianni, timmisartut pingasut Kangerlussuarmut utertariaqarsimapput, aammalu Nuummiit Nuummullu ullumikkut aqagulu timmisartuussinissat maannamut taamaatiinnarneqarput, Air Greenland marlunngornerup ualinerani ilisimatitsivoq.
Qaanaamut timmisartuussinissaq aamma taamaatiinnarneqartoq timmisartortitseqatigiiffik nalunaaruteqarpoq. Timmisartup inuttai Nuummiinnerat pissutaalluni Qaanaamut timmisartuussinissaq taamaammat unitsiinnarneqarpoq.
Danmarkiliartaat kinguartinneqarpoq
Air Greenlandip timmisartua Danmarkiliartaat marlunngornermi nalunaaqutaq 17-ip tungaanut kinguartinneqarallarpoq, timmisartumi ilaasussat utaqqineqarnerat pissutaalluni.
Angalasussat tamarmik airgreenland.gl aqqutigalugu angalanissanik malinnaasinnaapput, angalasussallu inniminniinerminnut atatillugu mobilimik normuanik ilanngussisimasut allannguutit pillugit smsikkut ilisimatinneqartassapput.
DMI naapertorlugu Paamiuni aamma Maniitsumi pingasunngorpat sakkortuumik anorlissangatinneqarpoq. Maniitsumi ilaatigut sekundtimut 30-nik anorlernissaa ilimasaarutigineqarpoq.