- Anniaat nassuiarneqarsinnaanngilaq

Katti Møller inuiattut ullorsiornermi kiisami sinilluarsimalluni iterpoq. Ilaqutariinnguit ilaqutariiullutik ilaquttatut isigilersimasaasa ajunaarfigisaanni tassaarsuaqarnerata kingorna, iluamik sinittarsimanngilaq.

- Meeqqatta mikineraniilli ilaqutariiulluta Nuugaatsiamiittuaannartarpugut. Illunnguaqarnikuuvugut aasaaneranilu tassungartuarluta, eqalunniariarluta aamma innuttaasut ilagalugit, taakku qanittunnguanngorpagut ikinngutigilerlugit, ilaquttatullu isigalugit. Ingammik ilaqutariit panimminnik, ningaaminnik aamma ernuttaminnik annaasaqartut qanigilersimavagut. Misigissutsitigut artornartorujussuuvoq.

- Paniat ajunaartoq meeqqatta paarisarnikuuaat, taamaammat uagut pigisutut isigisarparput. Ilaqutariinnguit taakku annaallugit alianartorujussuuvoq. Aliasunneq nassuiagassaanngilaq, Katti Møller, misigissutsiminik aqutsiuminaatsitsisoq oqarpoq.

Katti Møllerip nunaqarfik nuannersutut isigaa, pinngortitaq kusanartoq, ilaqutariillutik nuannarisaat.

- Tikinnerit tamaasa innuttaasut tallitik siaarlugit ilaquttatut tikilluaqqusarpaatigut. Aasaanerani tassungartarpugut, kisianni aamma ilaanni juullisioriartarpugut.

- Maanna nunaqarfimmukaraluaruma nunaqarfik ilisarisinnaajunnanngikkiga, nalunngisama ilaasa oqarfigaanga. Utoqqalilernitsinni umiatsiaqarunnaarnitsinnilu taakaniippallaarunnaarnikuuvugut, kisianni tassani innuttaasut pinngortitarlu nuannariuarparput.

Sinnattupiluk
Katti Møllerip qanoq pinersoqarsimanera tusaqqaaramiuk sinnattupiluttut misigaa. Qanoq pisoqarpiarsimanersoq takorloorsinnaanngilaa, kisianni inuit tikittalermata, illoqarfimmilu inuit amerligaluttuinnarmata, qulimiguulinnillu tikittunik aallaqqittunillu tusaasaqaannalerami, ambulancellu tusaaginnaleramigit, tamanna piviusumik pisoq paasilerpaa.

- Pisoq paasiuminaatsittorujussuuara, sooq taama pisoqarnersoq imminnut aperisaqattaarpunga. Paaserpiarnagulu arlaleriarlunga nassuiartittariaqarsimavara. Tassa taama uppernaatsigaaq.

Illoqarfimmi aamma tassaarsuaqarnissaanut kalerrisaarisoqarpoq, kisianni Katti Møller ilaquttanilu illumiiginnarput, illuat qutsissumi inissisimagami.

- Ullaakkut inuit kissasseriartorlutik isillattaalerput, ajunaarnersuarlu qanoq annertutigisoq pisimanersoq paasiartulerpara. Ulloq taanna ajortingaarama, nukeerutiivinnera pissutigalugu napparsimmaviliartariaqarsimavunga.

- Suna tamarmi qanoq kinguneqarumaarnersoq naluara. Aliasoqaagut, annernarpoq aamma anniarneq nassuiarneqarsinnaanngilaq. Pinngortitarsuaq qanoq nukittutigisinnaallunilu naakkittaatsigisinnaasoq, inuup inuuneranik naleqarlunilu avatangiisinik aseruitinnaatigisoq takuarput.

- Taamaammat tamatta asalluta, immitsinnut qiviarluta, paaraluta inuulluassaagut. Qaqugu naassanersoq naluarput, imaaliallaannaq pisinnaavoq, Katti Møller oqarpoq.