Anngunniunneq Nunatsinni ingerlanneqassava?
Qanittukkut tupinnartuliortoqassaaq Amerikap Nunavissuani Pissartanngorniunnissamut anngunniunnerit Nunatsinni ingerlanneqassappata. Angalaneq akisooq suli aaqqiissutissarsineqanngilaq
Angutit assammik arsarlutik Amerikap Nunavissuani Pissartanngorniunnissamut anngunniunnissaat Nuummi oktobarimi ingerlanneqassanersoq suli nalunartoqarpoq.
Sermitsiaq.AG-p siusinnerusukkut allaaserisarsimavaa nunat peqataasussat unammisartuinut pisortaanullu timmisartumik angalanerit akisoorujussuit pissutigalugit erniinnaq tupinnartuliortoqartariaqartoq, unammiuaarneq Nuummi ingerlanneqassappat.
Amerikap Nunavissuani Pissartanngorniunnissamut nunat anngunniuttussat tassaapput Canada, USA, Mexico, Cuba, Den Dominikanske Republik, Puerto Rico aamma Kalaallit Nunaat. Amerikap Nunavissuani Pissartanngorniunnermi angusarissaarnerpaat pingasut tullianik nunarsuarmi pissartanngorniunnissamut anngutissapput. Amerikap Nunavissuani Pissartanngorniunnissamut inissanut qulinut nunani allani sisamani anngunniuttoqassaaq.
Kalaallit Nunaanni Assammik Arsartartut Kattuffiat suli tunniutiinnanngilaq aningaasaqarnerlu iluarsiniarlugu sulissuteqarluni. Kingullermik inuussutissarsiornermik ingerlatsiviit annersaasa ilaat, nunani tamalaani assartuinermik attaveqarfilik akulerutsinneqarsimavoq, isumaqatigiissutinik pitsaanerusunik piniarluni. Assammik arsartartut kattuffiat malillugu sulissutigineqarpoq nunat peqataasussat Panama-mit aallartinneqarnissaat.
Nunanut allanut unammisartut, sungiusaasut minnerunngitsumillu Kalaallit Nunaanni Assammik Arsartartut Kattuffiata qanoq pisoqarnissaa pissangallutik utaqqivaat. Suliap ingerlarnga tamaat tamarmik qilanaarisimavaat unammiuaarnerup pingaarutillip siullermeerluni Nunatsinni ingerlanneqarnissaa.
Sungiusaasoq kajumissaarivoq
Nunanut allanut unammisartut sungiusaasuata Niels Møllerip kajumissaarutigeqqippaa oqartussaaffeqarfiit assigiinngitsut ataatsimoorlutik amigartooruteqarnermut sillimmasiissut arlaatigut inissinniaqqullugu. Nunat peqataasut angalanerup ilaa namminneq akilissavaat. Nunani Tamalaani Assammik Arsartartut Kattuffiat 500.000 koruuninik tapiissuteqarpoq.
- Paasisinnaanngilara timersornermik pisussap taama angitigisup naleqassusia Kalaallit Nunaanni takuneqarsinnaanngimmat aaqqissuussinissarlu tapersersorlugu. Ulluni unammiuaarfiusuni unamminerit pissanganartorujussuit ingerlanneqassapput. KNR periarfissaqassaaq unamminerit Kalaallit Nunaannut tamarmut aallakaatinnissaannik, Nuummilu 300-ungajannik isiginnaartoqartassaaq, Niels Møller ilaatigut oqarpoqa
Nunatta unammisartui sukalanerpaat peqataassappu
Håndboldligami unammisartut ajoqusersimasut marluk, Minik Dahl Høeghip, GOG aamma Aqqaluk Sørensenip, Århus Håndbold, ajoqusernermik kingorna sungiusaqqinnerat ingerlalluassappat Nunatta unammisartuni sukalanerpaat unammisorissavai.