Nanortalik
Annersaasimasut marluk unnerluutigisaasut
Angutit marluk 20-t sinnilaarlugit ukiullit anguteqamminnut sakkortuumik annersaasimasut Nanortalimmi unnerluutigineqarput
Nanortalimmi tallimanngormat unnukkut nipilersortunik tusarnaartitsisoqarpoq politiit ulapputeqarnerunerannik kinguneqartumik.
Angutimmi inuusuttut marluk 20-t sinnilaarlugit ukiullit maanna tigummigallagaapput anguteqatiminnut 30—t naajartorneranni ukiulimmut sakkortuumik annersaasimasutut pasineqarlutik.
Taama kujataani politiini politikommissæriugallartoq, Siivaleeraq Therkelsen, Sermitsiaq.AG-mut oqaluttuarpoq.
Atuaruk: Arnaq inuusuttoq itersamut nakkareerluni toqusoq
Angutit inuusuttut tigusarineqarnerat pivoq inuit arlallit imerniartarfiup silataani annersaanermik isiginnaarlutik politiinut kalerriuteqareersullu. Politiit takkunneranni angutit tamarmik ingerlareersimapput. Annersarneqarsimasorlu napparsimaviliaanneqareersimalluni.
Angut sakkortuumik annersarneqarsimavoq, inuunerminilli ulorianartorsiunngitsoq, kujataani politiit ilisimatitsipput.
Angutit inuusuttut tigusarineqartut kingusinnerusukkut eqqartuussivimmut sassartinneqarnissartik naatsorsuutigisinnaavaat.
Nanortalimmi politiit aamma pisarnerminnit amerlanerusunik angerlarsimaffimminni eqqissiviilliornernut sapaatip akunnerata naanerani orniguttariaqarsimapput.