Annassiniarnermik sungiusarnermi immikkut sungiusakkat peqataassapput

Uuliaarluernerit, umiarsuit aporneri timmisartullu nakkarnera, tamakkua tpisuusaartitat ilagaat sapaatip akunnerani tullermi Nuummi Mestersvigimilu issittumi upalungaarsimanermut sungiusarneq ingerlanneqarpat.

Sungiusarneq atserneqarsimavoq Arctic Response 2015, tamatumanilu Danmarkimi Beredskabsstyrelsen peqataassaaq.

Sungiusarnermi pisuusaartitat assigiinngitsut arlallit atorneqassapput, siunertarineqarporlu periutsit suleqatigiinnerullu misiligarnissaat kiisalu Issittumi pissutsini atugassarisani immikkut ittuni immikkoortoqarfiit ataasiakkaat annaassiniarnermi piginnaasaasa misiligarnissaat. Assersuutigalugu tassaasinnaapput timmisartup nakkarnerani, umiarsuit aporneranni imaluunniit annertunerusumik ajutoornerni ajunaarnersuarnilu, styrelsi paasissutissiivoq.

Immikkut ilisimasallit

Beredskabsstyrelsimit annaassiniarnermi immikkut ilisimasallit katillugit 22-t peqataassapput, ilaatigut akoorutissanut upalungaarsimanermut immikkut ilisimasallit kiisalu HazMat-imik upalungaarsimaffimmeersut, tamakkualu stoffit ulorianartut suliarisarpaat.

Immikkut sungiusakkat

Kitaani sungiusarnermi sammineqssapput ujaasinermik annaassiniarnermillu ingerlatsinerit aammalu stoffit kemiskiusut ulorianartut imaani passunneqartarnerat.

Tunumi sammineqassapput sumiiffinni tikikkuminaatsuni sulineq uninnganerlu, tamatumani ilanngullugu sineriak sinerlugu alapernaarsuineq ajutoorsimasut nunamut pisimasut ikiorniarlugit aammalu inunnut 190-inut tammaarsimaffiliorneq.

Tunumi sungiusarnerup ingerlarngani tamarmi immikkoortut tamakkiisumik imminnut pilersussapput, suliassallu isumaginiassavaat sakkutuuni immikkut sungiusakkat suleqatigalugit, Frømandskorpset aammalu Jægerkorpset.

Issittumi upalungaarsimasut

Issittumi upalungaarsimasut ilaatigut Forsvarsministeriap maanna Issittumi suliarisartagaanik ikiorsinnaassavaat, ilaatigullu Kalaallit Nunaanni upalungaarsimanikkut akisussaassuseqarnermi oqartussaasut ikiorsinnaassallugit.

Issittumi upalungaarsimasut pilersinneqarpata katiterneqassapput illersornissamut ministereqarfimmeersunik tamanik, timmisartut, umiarsuit, Beredskabsstyrelsimit immikkoortut il.il., ulluinnarni Danmarkimi suliassanik allanik ingerlatsisartunik imaluunniit nunani tamalaani ingerlatanut atatillugu.

Danmarki tamakkerlugu

Sungiusarneq Arctic Response ingerlanneqassaaq septembarip 17-iannit 26-annut.

Beredskabsstyrelsimit sulisut sungiusarnermi ulluinnarni attuumassuteqassapput styrelsip Haderslevimi, Herningimi, Thistedimi, Hedehusenemi, Næstvedimi, Bornholmimilu immikkoortoqarfiinut aammalu styrelsip akoorutissanut upalungaarsimasuinut.