Annaassiniarnermut sungiusarnerit annerpaartaat

Amerlanertigut umiarsuarmik ajutoortoqarnissaa ilisimaneqareerneq ajorpoq. Kisianni sungiusarnermi annertuumi Livex 2016-imi, Nuup eqqaani pisussami tamanna ilisimaneqareerpoq.

Atuaruk: Sakkutoorpassuit Kangerlussuup eqqaani sungiusartut

Umiarsuit aportut
Arfininngornermi maajip 28-ani umiarsuit marluk Nuup avataani apussapput.

Ullullu sisamat tulliuttut kalaallit oqartussat akisussaasut, Nunatsinni Politiit aamma Issittumi Sakkutooqarfik ilaasut ajoqusersimasut ingerlaqqinneq ajulertullu kiisalu umiarsuarni taakkunani marlunni inuttat qanimut suleqatigiillutik annanniassavaat, Sakkutooqarfik ilisimatitsivoq.

Qimagussorneqartut 200-t missaaniittut nalunaarsorneqarlutillu ikiorneqassapput. Ilaqutaasut, oqartussat aamma tusagassiorfiillu Issittumeersut arlallit nalunaarfigineqassapput, taamatullu avatangiisinut mingutsitsinissarsuaq pinngitsoortinneqarlunilu suliarineqassaaq.

Oqaluttuarisaanermi sungiusarneq annertooq
Tassanilu sungiusarneq annertoorujussuaq pineqarpoq. Sungiusarnermut peqataasut 350-t, Sakkutooqarfimmit piviusuusaartitsisut aamma pilersaarusiortut, Upalungaarsimanermut Aqutsisoqarfik, Politiit, kalaallillu oqartussat piffissami 23. maajimit 5. juunip tungaanut piareersarnermut aamma sungiusarnermut peqataassapput.

Kalaallit qallunaallu ajunaarnersuaqartillugu upalungaarsimasuisa aaqqissuussinissamut aamma pisut taama ittut suliarinissaanut sungiusarnissaat nukittorsarnissaallu siunertaavoq. Sungiusarnerlu annaassiniarnermut Nunatsinni annersaagallassaaq.

Timersortarfik
Sungiusarnermut peqaasut aamma piviusuusaartitsisut Nuummi najugaqartuunngitsut, Inussivimmi, Nuup Timersortarfiani aamma Sømandshjemmimi inissinneqarlutillu nerisinneqartassapput.

Sungiusarnermut kalaallit 100-t aamma qallunaat 100-t missaaniittut piviusuusaartitsinermullu peqataassapput.