Annaassiniarnerit amerlanersaat nuannersumik kinguneqartarput

Unnuaq nalunaaqutaq marlunut qulimiguulik Ilulissat Kangerluani umiatsiaaqqamik angalasut marluk annaanniarlugit aallarpoq. Tamanna silarluttumi pivoq, kisianni ajunngitsut qaqinneqarput.

Juulli sioqqutilaarlugu Nuup Kangerluani kalerrisaarisoqarpoq. Appanniartoq tammarsimavoq, politiillu angallataat, umiarsuaq alapernaarsuut, qulimiguullit aamma inuit kajumissutsiminnik ujaaseqataasut angut ujarpaat. Ajunngitsorlu nassaarineqarpoq.

Atuaruk: Inuit marluk unnuaq annaanneqartut

Amerlanerpaat annaanneqartartut
Annaassiniaanerillu amerlanerpaartaat qujanartumik taamatut naammassineqartarput.

Juullinngilaartoq annaassiniarnermut siunnersuisoqatigiit ukiumut imaatigut aamma timmisartorluni annaassiniartarnermi Kalaallit Nunaanni 2015-imut nalunaarusiartik Folketingimi Kalaallit Nunaat pillugu ataatsimiititaliamut tunniuppaat.

Tassanilu atuarneqarsinnaavoq, inuunerminnik navianartorsiortutut naatsorsuutigineqartut, ukiut tallimat ingerlanerini 96,8 procentii annaanneqarsimapput. 2015-imi kisitsit appasinnerulaarsmavoq, tassami 95,4 procentimiissimagami. Tamannali anguniakkamit annertunerusumik inissisimavoq, taanna 95 procentiummat.

Atuaruk: Ajunngitsoq nassaarineqartoq

Qulit toqusut imaluunniit maqaasineqartut
2015-imi inuit katillugu 216-iusut, inuunerminnik navianartorsiorsimasutut nalilerneqarput. Taakkunannga 206-it annaanneqarput.

Tamatumali saniatigut, ukiumi tassani inuit qulit, ilaquttaminnut angerlanngitsoorsimapput. Taakkunannga arfinilit toqungasut nassaarineqarput, sisamallu nassaarineqanngisaannarsimallutik.

Atuaruk: Politiit ujaasineq taamaatippaat: Angut toqungasoq nassaarineqarpoq

Umiatsiaaqqamik angalasut ajrnartorsiortut ikinnerusut
Ukiuni kingullerni 2013-ini SAR-inik (Search and Rescue) amerlanerpaanik annassiniaaffiusimavoq. Ukiumi tassani 121-eriarluni annaassiniaasoqarsimavoq, inuit 348-t inuunerminnik navianartorsiortitsisimapput.

Ukiup kinguliini SAR-imik annaassiniaanerit 90-inut ikileriarsimapput. Tamanna ilaatigut umiatsiaaqqamik angalasut ajornartorsiortut ikileriarsimanerinik pissuteqarpoq.

- Kalaallit Nunaanni ukiuni kingullerni imaani angalanermut tunngatillugu TV-ikkut aviisitigullu paasititsiniaanernik ingerlatsisoqarnikuuneranik pissuteqarsorineqarpoq, nalunaarummi allaqqavoq.

2014-imili ajortumik kinguneqarneranut tunngatillugu ukioq pitsaasuunngilaq. Ukiormi tassani katillugu 15-it toqusimapput imaluunniit nassaarineqanngillat.

Atuaruk: Piniartoq ujaarineqartoq ajunngitsoq nassaarineqarpoq

Kajumissutsiminnik ujaasisartorpassuit
SAR-imik annaassiniaanerit amerlanertigut politiinit ataqatigiissaarneqartarput. Politiit angallataat Sisak imaatigut ujaasisoqartillugu atorneqarnerpaasarpoq. Taakku sakkutuut umiarsuaannit, qulimiguuliannit ataasiakkaatigullu timmisartuannit ikiorneqartarput.

Annaassiniarnernili aamma kajumissutsiminnik ujaaseqataasorpassuaqartarpoq.

- Tamatumunnga ilaquttat, ikinngutit ilisarisimasallu kajumillutik najukkami ujaaseqataasarput, nalunaarummi tamanna allaqqavoq.