Ann Andreasen ataqqinaammik legatinnattoq

Ann Andreasen, Uummannami Meeqqat Angerlarsimaffiat, Gernes Fondenip ataqqinaammik legatianik 25.000 koruuninik aningaasartalimmik marsip 19-iani tunineqarpoq meeqqat inuusuttullu Uummannami meeqqanut inuusuttuaqqanullu angerlarsimaffimmi najugaqartut qasusuilluni inuunerannut ajunngitsumik aqqutissiuisarnini pillugu.

Ann Andreasen Savalimmiuni inunngorpoq peroriartorlunilu, perorsaasutullu ilinniagaqarpoq isumaginninnerullu iluani aamma ilinniagaqaqqilluni inuusuttunnguulluni Danmarkimi Nunatsinnilu.

Nunatsinnut attuumassuteqartuaannarnikuuvoq, angutaa angajoqqaaminillu aatai tamarmik meeraanerata nalaani Nunatta sineriaani aalisartuusimammata. Ataataminut aatakkuminullu, aamma Norgep Canadallu eqqaani aalisartuusimasunut, qanittumik attaveqartuusimanngikkaluarluni Nunarput pillugu meeraanermini tusagaqartuartarsimavoq.

Atuaruk: Ann aamma Tobias Nersornaammik sølvimik nersornaaserneqarput

Maniitsumut aqqanilinnik ukioqarluni nuuppoq
Angutaa kilisaammi naalaganngormat aqqalinnik ukioqarluni Maniitsumut nuuppoq, kisianni Danmarkimut atuariartortitaavoq. Taamaattorli Nunatsinnut uteqqinniarluni sinnattoriuaannarsimavaa. Tamannalu 1985-imi piviusunngorpoq, 25-nik ukioqarluni Uummannami meeqqat inuusuttuaqqallu angerlarsimaffianni atorfinikkami.

1987-imiit 1989-imut Uummannami meeqqat inuusuttuaqqallu angerlarsimaffianni immikkoortortaqarfimmi pisortaavoq, tamatumalu kingorna aamma tassani pisortanngorluni - ullumikkumut suli pitsaalluinnartumik pisortaaffigisamini.

Nunatsinnut nuunnginnermini aamma Israelimi sulisimasoq, inuit sakkortuumik aqqusaagaqarsimasut imminornissaminillu eqqarsaateqartut sullitarisimallugit. Taamaammat nalinginnaasimavoq inunnik immikkut isumassorneqarnissamut sullissinissaminik toqqaasimanera.

Assit: Aleqap aamma Ann Andreassen nersorniarpaa

Uummannaq isumaqarluarpoq Ann Andreasenimut
- Illoqarfimmut alutornarluinnartumut inutsialalimmullu pivunga pinngortitamik kusanarluinnartumik avatangiisilimmut. Inuuneq naappallaarpoq Uummannamiissimannginnissamut. Tamanna isumassarsiorfigiuminarpoq. Uummannarlu uannut isumalerujussuuvoq, inuunermullu tunngasunik tamaani ilikkagaqarsimaqaanga, Ann Andreasen killitsimaqisoq taama oqarpoq.

Ann Andreasenip inunnut sakkortuumik aqqusaagaqarsimasunut imminornissamullu eqqarsaateqartunut, aamma ajoraluartumik meeqqani inuusuttunilu Uummannami meeqqat inuusuttuaqqallu angerlarsimaffianni inissinneqarsimasuni atuuttuni, sullissisarnermini sakkugisartagaasa pingaarnersarivaat nipilersorneq, eqqumiitsuliorneq, erinarsorneq timersornerlu meeqqat inuusuttuaqqallu ulluinnarni nuannersunik eqqarsaateqalernissaat anguniarlugu.

- Eqqumiitsuliorneq assigiinngitsutigullu eqqumiitsuliorneq atorlugu katsorsaaniartarpugut perorsaaniartarlutalu meeqqanut inuusuttunullu sullitatsinnut, Ann Andreassen ataqqinaammik legatinnannermini taama oqarpoq.

Assit: Ban Ki-moon inussiarnissusermik siumuisinneqarpoq

Pinngortitaq katsorsaavittut
Uummannami meeqqat inuusuttuaqqallu angerlarsimaffiat aamma ilisimaneqarpoq pinngortitamut angallassisarminut, soorlu aamma ukiut tamaasa paarisaminut Ikerasammi arlalinnik illuuteqarfigisaminut poorskisioriartitsisartoq.

- Nunatsinni periarfissarpassuaqarpugut katsorsaanitsinni atorsinnaasatsinnik, tamakkualu meeqqat angerlarsimaffianni sullissinitsinni sapinngisamik atornissaat anguniartuartarparput, Ann Andreasen oqarpoq.

Uummannami meeqqat angerlarsimaffiat ulloq unnuarlu paaqqinnittarfiuvoq, 40-nik sulisoqarluni meeqqanut inuusuttuaqqanullu 32-nut inissaqartoq.