isorliunerusut
Aningaaseriviup pisortaata nuussinerup akissaa ujartorpaa
Grønlandsbankip pisortaata Martin Kviesgaardip borgmesterit Siumumeersut siunnersuutaat politikkikkut sualuttuliornertut oqaatigaa
Grønlandsbankip pisortaata Martin Kviesgaardip, Sulisitsisut Peqatigiiffiat politikerillu arlallit assigalugit, maluginiarpaa borgmesterit Siumumeersut pingasut pisortat suliffiinik 600-nik Nuummit sinerissamut nuussinissamik siunnersuutaasa akissaa taaneqarsimanngimmat.
Taamatut paasissutissiivoq Kristeligt Dagblad, tassanilu siunnersuut allaaserisami takkajaami allaaserineqarpoq.
Politikkikkut sualuttuliorneq
– Takusinnaasakka malillugit kinguneqaatissanut naatsorsuisoqarsimanngilaq. Politikkikkut iliuuseqarnertut isigalugu sakkortorpasippoq, Danmarkimilu naalakkersuisut suliffinnik nuussiniarnerannut sanilliullugu 15-eriaatip missaanik annertuneruvoq taamaasillunilu akisoorujussuussagunarluni, Martin Kviesgaard aviisimut mail-ikkut allappoq.
Aningaaseriviup pisortaata ilanngullugu oqaatigaa naatsorsuinerup takunissaa, aammalu assersuutigalugu Kalaallit Nunaanni Aningaasaqarnermut Siunnersuisoqatigiit siunnersuummut qanoq isumaqarnerisa tusarnissaa, qilanaaralugit.