mobilimik akiliisarneq
Aningaaserivinnik atuisut Mobilepay piumavaat
Naammagittartariaqarneq. Kalaallit Nunaanni aningaaserivinnik atuisut ukioq ataaseq sukkasuumik, digitaliusumik mobilikkut akiliisinnaanermut aaqqiissummik atuisinnaasimanngillat.
Mobilimik akiliilluni niuernermi unammineq Swipp-ip peqataaffigisinnaajunnaarpaa, februaarimilu siorna Swipp matuneqarmat Mobilepay ajugaalluni aaqqiissut piumaneqarneruvoq. Taamanili Mobilepayip atortunik pitsanngorsaanissaa Grønlandsbankenip aamma BankNordikip utaqqilerpaa, taamaalilluni kalaallit atuisut atorsinnaalerniassammassuk.
Mobilepay piumaneqarnerusoq
Mobilepayip kisianni kalaallit oqarasuaataasa normui arfinilinnik kisitsisitallik atuutilernissaannut aaqqiissutissamik suli ilimanartoqanngilaq.
- Atuisutta Mobilepay piumasaraat malugaarput. Attaveqaqatigiittarfitsigut soorlu Facebookikkut aamma Messengerikkut saaffiginnissuteqarfigineqakulasarpugut, kisianni aamma aningaaserivimmukarluni saaffiginnittoqartarpoq. Taamaammat kalaallit aningaaserivinnik atuisut aaqqiivigineqarnissaat maluginiaqqissaarparput, Ellen Arnskjold ilisimatitsivoq, taanna Grønlandsbankenip niuernerani ineriartortsiviani pisortaavoq.
- Ataavartumi aamma pitsaasumik Mobilepay oqaloqatigaarput, Kalaallit Nunaat taassuma tungaanit tunuinnarneqanngitsoq oqaatigaa, Ellen Arnskjold oqarpoq.
Niuernermut ineriartortitsinermut pisortap Swippip matuneraniilli periarfissanut allanut ammasimavoq.
- Digitaliusunik aaqqiissuteqarnissamut soqutiginnittorujussuuvugut, taamaattumillu atuisugut allanik soorlu My Wallet aamma Mobilbankimik neqerooruteqarfigaagut, Ellen Arnskjold oqarpoq.
Ullulerneqanngitsoq
Danske Bankip Mobilepay ingerlatseqatigiiffittut namminersortutut ingerlanissaa aalajangiunnikuuaa, ingerlatseqatigiiffiullu kalaallit niuernerannut akiliisarnermut systemi suli aaqqiivigineqannginneranut pissutaasut ilagaat.
Nunatsinni innuttaasut naammagittartariaqassapput. Mobilepayip qaqugu aaqqiissuteqarnissaanut naatsorsuuteqarsinnaanermut Grønlandsbanken suli ulluliiffigineqanngilaq.
Atorneqartorujussuaq
Swipp atorneqartorujussuugaluarpoq, matuneqannginnerminilu Grønlandsbankenimi atuisut sisamararterutaannit 18-it qaangerlugit ukiulinnit atorneqartarluni.