korti peqquserluffigineqartoq
Aningaaserivik: Sapaatip-akunneri pingasuni utaqqineq nalinginnaanngilaq
Danmarkimit nassiussamik nutaamik kreditkortitaarniarneq ullut tallimat qulillu akornanniikkajuttarpoq
Kalaallit Nunaanni aningaaserivimmi atuisutut, kreditkorti akiliut peqquserluffigineqarsimatillugu, sapaatip-akunnerini pingasuni utaqqisinnaanissaq ernumassutigineqartariaqanngilaq.
Grønlandsbankenip atuisoqarnermut pisortaa, Peter Petersen oqarpoq.
Utaqqinermi
Siumumi politikerip Aleqa Hammondip bilaginut suliaqartitsinerata kingulliup kingorna tamanna oqariartuutigaa, tassani politikeri Folketingimi kreditkortini atorlugu 12.900 koruuninik imminut aningaasanik atuisimasoq saqqummiunneqarpoq - taakkulu maanna utertissavai.
Sapaatip-akunnerini pingasuni taakku atorsimavai. Aleqa Hammondilu tassunga tunngatillugu nassuiaavoq, Folketingimit kortini ajornartoornermi atortariaqarsimallugu, nammineq kortini peqquserluffigineqarsimammat.
Atuaruk: Aleqa Hammond: Ajornartoornermi korti atorpara
Nalinginnaasumik
Peter Petersenip naqissuserpaa, atuisunut nalinginnaasumik atugassarititaasut pillugit oqaaseqarluni - Aleqa Hammondilu pillugu suliamut attuumassuteqanngitsoq.
- Atuisut nutaamik kortitaassagunik, assersuutigalugu peqquserluffigineqarsimagunik, sapaatip-akunnerini pingasuni utaqqinissartik ernumassutigisariaqanngilaat, pisortaq nassuiaavoq.
Ajoquteqanngitsoq
Taassumali saniatigut tikkuarpaa, tamanna ajornartoqanngitsumik ingerlasoqarnera apeqqutaasartoq, aamma atuisoq assersuutigalugu Kalaallit Nunaanniippat, korti Danmarkimit sananeqarfimminit tikisinneqartarpoq.
- Ullut tallimat qulillu akornanni korti nutaaq atuisut tigukkajuttarpaat. Ilaatigull sivisunerulaarsinnaasarpoq. Assersuutigalugu taakku akornanni weekendiusimappat, imaluunniit silarlunnera pissutigalugu nassiussat kinguaattoornerisigut, Peter Petersen oqarpoq.