Aningaasat 220 million koruunit siunnersuisartunut avataaneersunut atorneqartut

- Ilisimaneqartutut Namminersorlutik Oqartussat avataaniit siunnersorneqarnermut aningaasat atortagaat ikigisassaanngillat. Taamaammat paaserusunnarpoq aningaasat qanoq amerlatigisut suliffinnut siunnersuisartunut nunatta avataani angerlarsimaffeqartunut atorneqartarnersut.

Siumup Inatsisartuni ilaasortaatitaa, Vivian Motzfeldt, paragraf 37 naapertorlugu Naalakkersuisunut apeqqutaatini taama tunngavilersorpaa.

2016-imi 220 million koruunit

- 2016-imi siunnersortinut avataaneersunut katillugit 220 mio. kr. atorneqarput. Aningaasartuutit 2012-imut sanilliullugit 5 procentinik appariarput, Aningaasaqarnermut Akileraartarnermullu Naalakkersuisoq, Aqqaluaq B. Egede (IA) akissuteqarpoq.

Erseqqissaassutigaa, siunnersorti imatut paaneqartoq inuk suliassamik aalajangersimasumik suliaqarnissaq siunertaralugu piffissami sivikitsumi sivisunerusumilu atorfinitsinneqartoq.

Ilinniartitaarnermut peqqinnissaqarfimmullu attummaassutillit atuinerusut

Vivian Motzfeldtimut akissuteqaammi allassimavoq, Ilinniartitaanermut, Kultureqarnermut, Ilisimatusarnermut Ilageeqarnermullu Naalakkersuisoqarfik aammalu Peqqissutsimut Naalakkersuisoqarfik siunnersortinik atuinerpaasut.

- Atuiffiunerpaajuusut tassaapput ilinniarfinni ilinniartitsisut censorillu kiisalu peqqissaanermi nakorsat peqqissaasullu, Aqqaluaq B. Egede paasissutissiivoq.

Takussutissiaq 2016-imi Naalakkersuisoqarfiit siunnersortinik atuinerpaanik takussutissiami takuneqarsinnaavoq Ilinniartitaanermut, Kultureqarnermut, Ilisimatusarnermut Ilageeqarnermullu Naalakkersuisoqarfik 60 million sinnerlugit atorneqarsimasut aammalu Peqqissutsimut Naalakkersuisoqarfik 50 million koruuninik missaani atuisimasoq.

Atorfillit Nunatta avataani najugallit erseqqissarneri

Vivian Motzfeldtip aamma apeqqutigaa, Namminersorlutik Oqartussat ataanni sulisut qassit nunatta avataani angerlarsimaffeqartunut atorfigitinneqarnersut, taakkununngalu akissarsiat katinnerat qanoq amerlatiginersut.

- Tamanna pillugu ilisimasaqarnerulernissaq siunertaralugu sulisut nunani allani najugaqartut naalakkersuisoqarfinnut taakkulu immikkoortuinut agguarlugit maannakkut paasiniaasoqarpoq, Naalakkersuisut akissuteqarput.

Paasissutissiarineqarpoq, sulineq qaammatini aggersuni naammassissasoq ilimagineqartoq.

Atorfillit 108-t Nunatta avataaneersut

Ingerlatseqatigiiffinnilu Namminersorlutik Oqartussanik tamakkiisumik ilaannakortumillu piginneqataaffigisaat qassinik nunani allani angerlarsimaffeqartunik nunatta avataani atorfeqartitsinersut apeqqutaa pillugu, Aqqaluaq B. Egede Vivian Motzfeldtimut oqaatigaa.

- Tassunga atatillugu akissarsiat 34,2 million koruuniupput, Aningaasaqarnermut Naalakkersuisoq allappoq.

Suliffeqarfiit anginerit ilanngunneqanngitsut

Suliffeqarfiillu sorliit Nunatta avataaneersunik qanoq amerlatigisunik atuinertik pillugu paasissutissiisimanerinik, akissuteqaammi allassimanngilaq. Taamaattooq Naalakkersuisut paasissutissiipput, Namminersorlutik Oqartussat suliffeqarfiutaanni soorlu Royal Greenland A/S, Royal Arctic Line A/S, TELE Greenland A/S aamma KNI A/S ilaatinneqanngitsut.

Ingerlatsiviillu ilaasa apeqqut piffissaritinneqartup iluani akisinnaasimannginneri, tunngavigineqarpoq.