sipaarniuteqarnerit
Aningaasartuutit avitsigit
Kommueqarfik Sermersuup borgmesteriata Asii Chemntiz Narupip maanna siunnersuutigaa Illoqqortoormiuni utoqqarnik paaqqutarinninnermut napparsimmavimmullu aningaasartuutit namminersorlutik oqartussat kommunillu avissagaat
– Utoqqarnut ataatsimoorussamik angerlarsimaffiuteqarpugut nakkaattuulivissumik, aammalu ulikkaavissumik, naak Peqqinnissaqarfik illuuteqaraluartoq innanngavinnik qulinik inissalimmik atorneqarpiarnerlu ajortumik. Peqqinnissaqarfiup Kommunillu pineqartuni Ittoqqortoormiini atorfiit assigeeqqissaat pisariaqartippaat, taamaattumik isumaqarpunga ikioqatigiittoqarsinnaasuuppat tamanna ajunngitsumik kinguneqarsinnaagaluartoq, immaqalu aningaasartuutit avitseqatigiiffigineqarsinnaagaluarlutik, borgmester Asii Chemnitz Narup tusagassiorfinnut nalunaarutikkut oqarpoq, isumaqarporlu taamaasiornikkut innuttaasut pitsaanerusumik sullinneqalissasut, tamannalu peqatigalugu aningaasanik sipaartoqarluni.
Borgmesteri nuannaarutigaa Ittoqqortoormiini nakorsaqarnerup sipaarutigineqarnissaanik pilersaarutit peqqissutsimut Naalakkersuisup Martha Lund Olsenip tunuartimmagit,, taamaakkaluartorli suli allannguisoqartariaqarnera pisariaqartinneqartoq isumaqarpoq.
– Nuannaarutigaara silatusaarneq ajugaammat, Ittoqqortoormiinilu innuttaasut suli nakorsiarnissamut periarfissaqarmata, borgmester Asii Chemnitz Narup oqarpoq.
Borgmesterili suli isumaqartuarsinnarpoq, Peqqinnissaqarfiup illoqarfimmik sullissinera pillugu eqqarsaqqittoqartariaqartoq:
– Paamiut siusinnerusukkut Nuummi nakorsiartarfimmit sullinneqartarsimavoq. Nakorsat paarlakaallutik Paamiuni sulisarput. Ittoqqortoormiini nakorsamik aalajangersimasumik pissarsisoqarsinnaanngippat immaqa aaqqiineq taama ittoq eqqarsaatigineqartariaqaraluarpoq, tusagassiorfinnut nalunaarut naapertorlugu taanna oqarpoq.
Kommuneqarfik Sermersuup Martha Lund Olsen siunissami suleqatigiissinnaaneq pillugu ataatsimeeqatiserivaa, sulili tamanna akissuteqarfigineqarsimanngilaq.