EU-mut isumaqatigiissut
Aningaasartai nikisinnagit pisassat ikinnerulersinneqarput
Nunatta EU-llu akornanni aalisarneq pillugu isumaqatigiissummut ilassummi nutaami, EU-p akiliutigisartagai allanngortinnagit aalisakkat ikinnerusut EU-mit pisarineqartassasut isumaqatigiissutigineqarput
EU-p aamma nunatta aalisarneq pillugu isumaqatigiissutaanut ilassut nutaaq piffissamut 2016-imiit 2020-mut atuuttussaq EU-p nunatta imartaani aalisarsinnaaneranik periarfissiisoq kiisalu EU-p tassunga akiliutissai pillugit isumaqatigiinniarnerit nunatta EU-llu tallimanngornermi naammassivaat.
Taama Namminersorlutik Oqartussat tusagassiuutinut nalunaaruteqarput.
Namminersorlutik Oqartussanit ilisimatitsissutigineqarsinnaavoq aalisarneq pillugu isumaqatigiissut allanngortinneqanngitsoq.
- Kisianni aalisarnermi piumasaqaatit aalisarneq pillugu isumaqatigiissummut ilassummi periarfissiisut immikkoortuni arlalinni nutarterneqarput. EU ikinnerusunik pisassaqaleraluartoq aalisarneq pillugu isumaqatigiissummut ilassummi EU-p akiliutaasa allanngunnginnissaat isumaqatigiissummi qulakkeerneqarpoq, Namminersorlutik Oqartussat taama allapput.
Ukiunut tallimanut 663 millioner koruunit
Isumaqatigiissummut ilassutinik nutarterinerup kinguneraa ukiuni tallimani isumaqatigiissummut ilassutip atuunnerani nunarput 89 millioner euronik (663 millioner koruunit missaat) akiliiffigineqartarnissaa.
- Isumaqatigiinniarnermi tassani angusat EU-p aamma Kalaallit Nunaata immikkoortuni tamani suleqatigiilluarnerisa ingerlaannarnissaa qulakkeerneqarpoq aamma nunap karsiata pisariaqartumik isertitsisarneranut tapersiilluni, aalisarnermut, piniarnermut nunalerinermullu naalakkersuisoq, Siumumeersoq Karl Kristian Kruse oqarpoq.
Isumaqatigiinniarnermi angusat januaarip aallaqqaataaniit 2016-imi atuutilinnginneranni Naalakkersuisunit EU-millu inaarutaasumik akuerineqassapput.