aningaasarliorneq

Aningaasaqarnikkut ajalusoorneq ingasattajaagaavoq

Professori aamma Aningaasaqarnermut Siunnersuisoqatigiinni siulittaasup, Torben M. Andersenip, politikerit aaqqissuusseqqinnernik aallartitsinngippata, aningaasaqarneq ukiut pingasut iluanni ajalusoornissaa ilumuunnginnerarpaa

Torben Andersen, Økonomisk Råd
Aningaasaqarnermut Siunnersuisoqatigiinni siulittaasoq, Torben M. Andersen

Aningaasaqarnerput pitsaavallaanngilaq, kisianni aamma ajornerunngilaq. Ukiut pingasut iluannilu ajalusoornavianngilaq.

Professori aamma Aningaasaqarnermut Siunnersuisoqatigiinni siulittaasoq, Torben M. Andersen, ullumi taama oqarpoq. Aviisip Børsenip ataasinngormat Nunarput pillugu allaaserisaani aningaasaqarnikkut aaqqissuusseqqittoqanngippat ajalusoortaqarnissaa oqaluttuarineqareersorlu, KNR-imut taama oqaaseqarpoq.

Allaaserisaq taanna uani nittartakkami KNR-imit aamma issuarneqarpoq.

Atuaruk: Siulittaasoq: Kalaallit Nunaat aningaasaqarnikkut ajalusoornissamut qanippoq

- Kalaallit Nunaat allanngorfissami inissisimavoq, illuani ajortumik ingerlaneq utikaajaartoq, illuanilu aningaasaqarnermut imminut nammannerusumut saakkiartorneq, aaqqissuusseqqinnissanik annertuunik piviusorsiortunik pisariaqartitsisoq. Tamanna isumagineqanngippat kingunerissavaa, Nunatsinni aamma Nunani Avannarlerni inooriaatsip qaffasissusaasa assigiinngissusaat annertuallaalissaaq, ilinniarluarsimasullu takoriikkatsinnit annertunerusumik nunamit aallartalissapput, Torben M. Andersen Børsenimut taama oqarpoq.

Aaqqissuusseqqinnerit pingaaruteqarput
Børsenimi allaaserisaq naapertorlugu aningaasaqarnikkut ajalusoorneq 2019-ip missaani pisinnaavoq. Kisianni tamanna ingasattajaarinninnerusoq, Torben M. Andersen KNR-imut nassuiaavoq:

- Børsenimut oqaatigisara tassaavoq, ukiut marluk pingasut iluanni aningaasaqarnikkut aaqqissuusseqqinnernik aallartitsisoqarnissaa pingaaruteqartoq, aammalu politikkikkut aalajangiisoqartariaqartoq, taamaalilluni nammineq nammattumik aningaasaqalernissamut saattoqassammat, Torben M. Andersen oqarpoq.

Naalagaaffimmit tapiissutit
Akunnermiuliuttut ilagaat, naak naalagaaffiit tapiissutaat 3,7 milliardit koruunit nikittussaajunnaartinneqarnikuunerat pissutigalugu ikiliartornerat, aningaasat naleerukkiartornerat pissutaalluni.

Naak aningaasatigut tapiissuteqaraluartoq aningaasartuutit isertitallu akornani equngasoqarpoq. Nunap karsiani aningaasat assigiilissappata, ukiut tamaasa 2030-ip tungaanut 750 millionit koruunit amigaatigaagut. Aaqqissuusseqqittoqanngippat sipaarniartoqangaatsiassaaq - innuttaasullu nuttarnerannik kinguneqarsinnaavoq.

Oqaluttuaq tamaat KNR-imi atuarsinnaavat: Torben M. Andersen: Kukkusumik issuarneqarpunga

Powered by Labrador CMS