qinersineq 2014
Aningaasaqarniarneq Danmarkimut attaveqarnermit pingaaruteqarneruvoq
Michael Böss: – 2013-imi qinersinermi nunaqarfinni aalisartut inuillu appasissumik ilinniagallit Aleqa Hammond Siumullu naalakkersuisunngortippaat
Kalaallit Nunaanni qineqqusaarnermi aningaasaqarniarneq Danmarkimut attaveqarnermit pingaartinneqarneruvoq, immikkut ilisimasalik taama isumaqarpoq.
Novembarip 2i-anni Nunatsinni qinerseqqissaagut. 2013-imi marsip 12-anni qinersisartut Aleqa Hammondimik Siumumillu naalakkersuisunngortitsinerisa kingorna ukiut aappaata affaa qaangiutiinnartoq.
Kingullermik qinersineq taama ungasitsiginngikkaluartoq oqallisigineqartut allanngorujussuarsimapput. Taamatut oqarpoq Kalaallit Nunaannik ilisimannittoq, atuakkiortoq Aarhus Universitetimilu lektori Michael Böss.
Pingaartumik sammisassap aalajangersimasup ataatsip sammineqannginnera maluginiarpaa.
– Naalagaaffeqatigiinnermut apeqqut. Tamassuma sammineqannginnera maluginiagassaavoq. Kalaallit Nunaanni politikkip tamatigut ilisarnaatigisarsimagaluarpaa apeqqutit pingaarnersaat tassaasoq naalagaaffeqatigiinnermut apeqqut, taanna oqarpoq.
– Tamanna qinersinermi kingullermi sunniuteqarluarsimavoq. Kalaallit innuttaasut avissaartuuffigaat, Aleqa Hammondillu qinigaanera qulakkeerlugu. 2013-imi qinersineq Danmarkimut naalagaaffeqatigiinnullu attaveqarneq kalaallini inuiaqatigiinni avissaartuuffinnik takutitseqataavoq.
– 2013-imi qinersinermi aalisartut nunaqarfinnilu inuit annikitsumik ilinniagallit Aleqa Hammond Siumullu naalakkersuisunngortippaat. Qinersisartut tamakkua kalaallinut illoqarfimmiunut middelklassinut ilinniagaqarluarnerusunut illua'tungiliupput, Michael Böss isumaqarpoq.
Michael Böss naapertorlugu qinersinissamut matumunnga mamianartuliaq ataaseq aningaasaqarnermillu nalunaarusiat nakeriallannartut marluk Kalaallit Nunaanni qinersisartunut allaanerujussuarmik qinersisussanngortitsisimapput.
– Qanoq iliortoqassava: Attaveqaatit ineriartortinneqaannassappat imaluunniit peqqissutsikkut isumaginninnikkullu ajornartorsiutit, inuiaqatigiit sorsuutigisaasa, ilaat aaqqinniarneqassappat.
Malunnannginnerusumilli suli kinaassutsimik ajornartorsiut, tassa qangatut piniartutut inuusuttutullu illoqarfimmiutut, ajornartorsiut suli atuuppoq.
– 2013-imi aamma kalaaliussutsimik nuanniitsumik oqallinermi avissaartuuttoqarpoq. Kinassutsimik ajornartorsiuteqartoqarpoq. Illoqarfimmiut Kalaallit Nunaat allaanerusumik isigigunarpaat. Piniartut kulturiat nunaqarfimmiutullu inuuneq qangarsuarli nalulersimavaat, Michael Böss oqarpoq.
/ritzau/