Aningaasaqarnermut Siunnersuisoqatigiit: Mittarfinnut suliniutini nalorninartut ilimagineqartumit annerupput

Mittarfiit nutaat aningaasalerneqarnerini aningaasaqarnikkut navianartorsiut tamaat Namminersorlutik Oqartussat kisermaappaa

Mittarfinnut suliniutissanut tunngatillugu nunap karsianut navianartorsiortitsineri naammaginartumik misissorneqarsimanngillat. Aningaasaqarnermut Siunnersuisoqatigiit suliniutit pillugit allakkiaminni taama allapput. Tassami Namminersorlutik Oqartussat aningaaqarnikkut navianartorsiut tamaat tiguaat.

- Imaanngilaq aningaasaliinissamut periuseq toqqarneqartoq ajortoq, kisianni politikerit navianartorsiut qanoq ittoq ingerlannerlugu ilisimasariaqarpaat, Torben M. Andersen Sermitsiaq.AG-mut oqarpoq.

Mittarfiit nutaat pillugit inatsisissatut siunnersuut Inatsisartut ataasinngorpat siullermiissavaat. Siunnersuut naapertorlugu Namminersorlutik Oqartussat toqqaannartumik Kalaallit Airportsimut 2,1 milliardit koruuninik aningaasaliissapput. Tamatuma saniatigut Namminersorlutik Oqartussat 1,4 milliardinik qularnaveeqqusiissapput imaluunniit aningaasat namminneq taarsigassarsiarissavaat.

- Sanaartornermut aningaasartuut qaffassappata imaluunniit ingerlatsinermut aningaasartuutit qaffassappata, taava tamanna nunap karsianut akiligassanngussaaq, Torben M. Andersen oqarpoq.

Siunertanut allanut aningaasanik amigaateqartoqarsinnaasoq

Mittarfinnut akit 5-10 procentimut qaffalaaginnarpata, taava pisortat aningaasaateqarfii 180 aamma 360 millionit koruuninik artukkerneqassapput. Suliniutini taama annertutigisuni 5-10 procentimik qaffariaatit pisinnaanerat piviusorsiortuuvoq, Aningaasaqarnermut Siunnersuisoqatigiit isumaqarput.

Soorunami akerlianik mittarfiit ilimagisamik niuerfiulluarnerussappata nunap karsia iluanaaruteqassaaq.

Aningaasaqarnermut Siunnersuisoqatigiit navianartorsiornermik taama annertuumik pingaartitsinera, suliniutip annertuneranik aamma allanut aningaasassaqarpallaannginneq pissutaavoq. Ingammik piffinnut ajornernut aningaasassaqartoqanngimmat.

Namminersorlutik Oqartussat Telemit, nunap karsiani iluanaarutinit aamma akileraartitsineq pissutigalugu saniatigut isertitanik akiliuteqarnerisa kingunerissavaa, aningaasaqarnikkut ajortumik ingerlasoqalissappat, aningaasanik sinneqartooruteqartoqarsinnaajunnaarnissaa.

Akileraarutinik qaffaanerit imaluunniit sipaarniarnerit

Karsimi amigartoorutit matuniarlugit akileraarutinik nutaanik imaluuniit annertuumik sipaarniartoqarnissaanik tamanna kinguneqassaaq.

- Taamatut pisoqarsinnaaneranut politikerit taamatut aalajangerunik piareersarnissaat pingaaruteqarpoq, Torben M. Andersen oqarpoq.

Namminersorlutik Oqartussat qularnaveequsiippata imaluunniit namminneq taarsigassarsisuuppata erniat appasinnerulersinnaanerannik inuiaqatigiit aningaasaqarneranni misissueqqissaarnermi tikkuaasoqarnerani, Aningaasaqarnermut Siunnersuisoqatigiit oqarnerat naapertorlugu, tamanna navianartorsiornermik kisimik nammassisuunerannik pissuteqartoq taamaammat maluginiartariaqarpoq.

Powered by Labrador CMS