Kalaallit Airports
Aningaasaqarnermut Siunnersuisoqatigiit mittarfissanut misissueqqissaarnerit amigaatigaat
Aningaasaqarnermut Siunnersuisoqatigiit Ilulissani, Nuummi Qaqortumilu mittarfiliortitsinissamut eqikkaanerat atuaraanni mianersoqqussuteqartoq atuarneqarsinnaavoq.
Siunnersuisoqatigiit siulittaasuata Torben M Andersenip oqaatigaa mittarfiit pingasut taakku aningaasatigut imminut akilersinnaanngitsut.
Aningaasaliissutit pisariaqartinneqartut
- Suliniutigineqartuni taamaammaat Namminersorlutik Oqartussat aningaasaliinerisigut aatsaat pisinnaavoq, kisianni Namminersorlutik Oqartussat aningaasaqarneranut sunniuteqarsinnaasoq, Aningaasaqarnermut Siunnersuisoqatigiit nalunaarusiaanni, pingasunngornermi tusagassiortunik katersortitsinermi saqqummiunneqartussami, mianersoqqussutigineqarpoq.
- Ukiut ingerlanerfigineqartussat nalaani ingerlatsilluarnissaq tunngavingalugu ukiuni ingerlalluarfiusuni isumannaallisaaneq pisariaqarpoq. Tamannalu aningaasanut inatsissatut siunnersuummi pinissaa siunnersuutigineqarsimanngilaq, taamaammat aningaasarsiorniarnerup nalaani ingerlanerluttoqalerpat, Nunatta karsianut kingunerlorujussuarsinnaasoq, nalunaarusiami erserpoq.
Tamatumani mittarfiliornermi aningaasartuutigineqartussat kisimik pineqaratik, ingerlatsinermut tunngasut ukkatarineqassasut, Siunersuisoqatigiit naqissuserpaat. Siunissami Namminersorlutik Oqartussat pisariaqarititsisoqalernerani ingerlatsinermut tapiissuuteqarnissaat pisariaqalersinnaavoq, tamannalu pisortat aningaasaqarnerinut sunniuteqarnerluttussaavoq.
Nangaanartoq
- Mittarfiliornissamut pilersaarutini suliniutaasup inuiaqatigiit aningaasaqarnerinut takussutissartaqarani misissuiffigeqqissaarneqarsimannginnera, nangaanartoqarpoq, taama naqissusiisoqarpoq.