Kujataa

Aningaasaqarnermut siunnersortit marluk inissianik attartortunut ikiuutaassaapput

Kommune Kujalleq, Namminersorlutillu Oqartussat suleqatigalugit INI A/S, Kujataani inissiani attartortittakkani najugaqartut aningaasatigut siunnersorneqarnissaannut neqeroorfigineqartalissagamik, misiliummik suliniut aallartinneqarpoq.

Qaqortoq
Boliglejere hos boligselskabet INI A/S i blandt andet Qaqortoq kan få økonomisk rådgivning, hvis de har gæld eller ved pludselig ændringer i lejerens økonomiske situation.

Aningaasaqarnermut siunnersortit marluk atorfinitsinneqareerput, taakkua akeqanngitsumik nipangersimasussaatitaagamillu kinaassutsinik nalunaarsuinertaqanngitsumik Kujataa tamakkerlugu siunnersuisartussaapput, INI A/S tusagassiuutinut nalunaarummi paasissutissiivoq.

Aningaasatigut siunnersuisartut ulluinnarni Narsami Qaqortumilu INI A/S-ip allaffiini sulisuussaapput.

Attartortut siunnersorneqarneri

- Siunnersortit suliassaraat attartortunik siunnersuissallutik, taakkua ineqarnermut akiliutissamikkut ajornartorsiuteqaleraangata, soorlu ulluinnarni aningaasaqarnikkut allanngoriataartoqartillugu imaluunniit akilersugassatut pisussaaffigisat piffissaq eqqorlugu akilersornissaat ajornartorsiutaalertillugit, inissiaatileqatigiiffik Namminersornerullutik Oqartussanit pigineqartoq nalunaaaruteqarpoq.

Aningaasatigut siunnersortit siunnersuillutillu ilitsersuisinnaasassapput, soorluttaaq aningaasaqarnikkut atukkat, akiitsut akiligassallu tamakkiisumik aqussinnaalernissaannut ilitsersuisinnaasassallutik, aammattaaq kommune, Namminersorlutik Oqartussat, aningaaseriviillu suleqatigalugit atorluagassatut periarfissaasut tamaasa atorneqarnissaat qulakkeertartussaavaat.

Attartortut inigisaminnit anisitaasarnerinik ikilisaataassasoq

Aammattaaq attartortoq peqatigalugu aningaasaqarnermut siunnersortit missingersuusioqataasassapput pisariaqarfiitigullu pisortaqarfiit akiligassaqarfiillu attavigisinnaasassallugit, INI A/S paasissutissiivoq.

- Taamatut aaqqissuussineq misileraaneruvoq, attartortut inigisaminniit anisitaanissaraluisa pinngitsoortinnissaat, ikilisinnissaalluunniit anguniarlugu ingerlataavoq. Taamatut aaqqissuussinikkut annertuumik akiitsoqalertartut
inuuniarnermikkut aaqqikkuminaatsumik inissisimalernissaraluat pinaveersaartinneqartassaaq, INI A/S allappoq.

Aningaasaqarnermut siunnersortit attartortunut ikiuiumallutik saaffiginnittartussaapput imaluunniit attartortut aningaasaqarnermut siunnersortinut saaffiginnittarsinnaapput uunga mailerlutik ikorfaq@ini.gl imaluunniit 70 10 00-mut sianerlutik.

Powered by Labrador CMS