Friday, October 6, 2017 - 07:48

Aningaasaqarnermut naalakkersuisoqarfiup aalisarnermut inatsit isornartorsiorpaa

Assi.: Leiff Josefsen
Aningaasaqarnermut naalakkersuisoqarfik aalisarnermut piniarnermut naalaakkersuisoqarfiup aalisarnermut inatsit saqqummiussaa sakkortuumik isornartorsiorpaa. Tamanna tusarniaanermut akissutini atuarneqarsinnaavoq, Sermitsiaq.AG-p allagaatinik takunnikkumanermini pissarsiarisimasaani.

Aningaasaqarnermut naalakkersuisoqarfiup pisortaa, Nikolai S. Christensen, tusarniaanermut atatillugu aqqanilinnik quppernilimmmik akissuteqaammik nassiussisimavoq, tassani inatsisissatut siunnersuutip maanna ilusaa naapertorlugu aningaasaqarnikkut kingunissai ernummassutigineqartu atuarneqarsinnaavoq.

Aningaasaqarnikkut malunnaatilimmik kingunissaqartoq
Immikkoortumi ''aningaasaqarnikkut kingunissani'' aningaasaqarnermut naalakkersuisoqarfik ilaatigut allappoq:

  • ''Aalisarnermut inatsisissatut siunnersuummi saqqummiunneqartumi erseqqissarneqanngitsumi Namminersorlutik Oqartussat aningaasaqarnikkut annertumiik ajutooratarsinnaalluni iliorpoq''
  • ''Annerusumik taarsiisoqassagaluarpat Namminersorlutik Oqartussat aningaasaqarnikkut qanoq iliornissamik kiffaanngissuseqarneranik sunniisoqassaaq, taamatullu pisortat kiffartuussinerisa aamma attaveqaatit pitsanngorsinnaanerat''

Aningaasaqarnermut naalakkersuisoqarfik allappoq, siunnersuutip aningaasaqarnikkut kingunissai naammaginartumik erseqqissaatigineqanngitsut. 

- Aalisarnerup nunap aningaasaqarneranut pingaaruteqarneranut tunngatillugu, allannguinissamik siunnersuutit annertuut naammaginartumik nassuiarneqarnissaat immikkut pingaaruteqarpoq, akissuteqaammi tamanna allaqqavoq.

Kingunissat nassuiaataannik amigaateqartoq
Naalakkersuisoqarfik ''kilisaatinik tunisassiorfiusunik tallimanik aningaasaliissuteqarnissamut aalajangerneqaqqammersut aalisarnermut inatsisissamit nutaamit qanoq sunnertinnissaasa kingunissaannik nassuiaatinik'' amigaateqarpoq. Aammattaaq aalisarnermut inatsimmi allannguutissatut siunnersuutit aalisarnermi allanilu allanngujaatsumik aamma iluaqutaasumik aningaasaliisarnerit sutigut sunnerneqarnissaannik naliliinermik amigaateqartoqarpoq.

''Inuiaqatigiinni assigiinnginnerup'' millisarneqarnissaa pingaarnertut siunertaasoq ilisimaneqartoq, aningaasaqarnermut naalakkersuisoqarfik allappoq.

- Inuiaqatigiinni aningaasaqarnikkut assigiinngissuseq ataatsimut isigalugu akileraartarnikkut aamma atugarissaarnermut tunngasunik suliniuteqarnikkut naleqquttumik nalimmassarneqarsinnaapput, isumalluutit erniaasa akitsuutit aamma akileraartarnermut inatsiseqarnerup aaqqissuunnerisigut kiisalu iluatsittumik ilinniartitaanikkut suliffeqarnikkullu politikkikkut iliuuseqarnikkut, tamanna naqissuserneqarpoq.

Soqutigisaqartut allat isornartorsiutitgisaat saqqummiunneqartut amerlapput.

Siunissami pisassiisarnissaq
Aalisarnermut inatsisissamut siunnersuutip siunissmi pisassiisarnerup qanoq aaqqissuunneqarnissaa eqqartunngilaa, aningaasaqarnermut naalakkersuisoqarfimmit aamma tamanna isornartorsiorneqarpoq, ima allappoq:

- Inatsimmut nutaamut siunnersuummut atatillugu pisassiissutit taamaatinneqarneranni suliarilluakkamik tulluartumillu qulannginnissaq, nalilinnik annaasaqannginnissaq aamma aalisarnermi aningaasaliinerit nutaat uninnginnissaat piniarlugu agguaasarnissamut siunnersuummik saqqummiussisoqartariaqarnera immikkut pingaaruteqarluinnartutut isigineqartariaqarpoq.

Seneste nyheder / Nutaarsiassat kingulliit