Tuesday, August 22, 2017 - 12:07

Aningaasaqarnermut inatsit 2018: Ukunani millionit annikitsukkuutaat illuartinneqarput

Meeqqat inunngujaartartut ikiorserniarlugit aningaasat 6 millionit koruunit immikkoortinneqarput.
Assi.: Gonzales Photo/ Carsten Fjellerad / Polfoto
Oqartussat ingerlatsiviillu arlallit millionilikkuutaanik aallerigineqassapput. 2018-mut aningaasanut inatsisissamut kikkut iluaquserneqarsimanersut takukkit.

Ikiaroornartumik eqqussuisarnerit akiorniarlugit sulinerit annertusaavigineqassapput, tamatumunngalu tunngatillugu Akileraartarnermut Aqutsisoqarfik aningaasanik 3 millionit koruuninik immikkoortitsivigeqassaaq, taakkuli aningaasat Ilulissani ilanngaaserisut qimmillit marluk ilaliunneqarnissaannut kiisalu Kangerlussuarmi ilanngaaserisumik qimmilimmik ilaliunneqarnissaanut atorneqassapput.

Atornerluinermut katsorsartinnerit

Aasianni atornerluinermut katsorsaavimmik pilersitsinissamut aningaasat 3 millionit koruunit ukiumut ingerlatsinermut atugassaattut immikkoortinneqartalissapput, taamaasilluni kommuneqarfiit tamarmik katsorsaaveqalissallutik.

Oqaatsinut tunngasut nukittorsaavigineqarniarput, taamaammat Oqaasileriffik ukiumut 1,0 millinit koruuniinik Oqaatsit pillugit periusissaq pillugu ukioq naallugu marlunnik sulisoqarnissaanut aningaasaliiffigineqaqqilluni. 

Kalaallit Nunaanni Eqqumiitsulianut Toqqorsivik Kalaallit Nunaata Eqqumiitsulianut Toqqorsiviliornissaanut 2 millionit koruuninik tapiissuteqarfigineqassaaq.

Sinniisoqarneq

Nunarput Reykjavikimi sinniisoqalernissaa aalajangiunneqarsimavoq. Islandimilu atorfimmik pilersitsinissamut aningaasat 2,5 millionit koruunit ukiumut immikkoortinneqartalissapput. Akissarsianut 900.000 koruunit ingerlatsinermullu 1,6 millionit koruunit atorneqartassallutik.

Peqqinnissaqarfik 10 millionit koruuninik amerlisaavigineqassaaq taakkuli Dronning Ingridip Napparsimavissuanut immikkoortinneqassapput, aammalu napparsimasunik angallassinernut qimarngutitsinernullu atugassatut 13 millionit koruunit immikkoortinneqassallutik.  Aammattaaq meeqqat inunngujaartartut iluaquserniarlugit immikkut suliniutigineqartoqassaaq. Napparsimavimmi immikkuullarissumik immikkoortumik pilersitsisoqassaaq, tassani taakku meeqqat paaqqutarineqassallutik, tamannalu 6 millionit koruuninik akeqassaaq.

Seneste nyheder / Nutaarsiassat kingulliit