Aningaasaqarnermut Ataatsimiititaliaq: Aap, aningaasaqarneq isumakulunnarpoq

Nunatta karsiata 2014-mut aningaasaqarnera 275 million koruuninit amerlanerusunik amigartooruteqartussaanerata pingasunngormat tusarliunneqarmat inuiaqatigiinnit aalassassimaarutigineqarpoq. Aningaasanut inatsip suliarineqarnerani 21 million koruuninik sinneqartooruteqarnissat naatsorsuutigineqarsimagaluarpoq. 2014-imi missingersuutinik malittarinninneq Aningaasaqarnermut Ataatsimiititaliamit oqaluuserineqaqqammerpoq, taannalu ataatsimiititaliamit eqqissisimasumik tiguneqarpoq.

Aningaasaqarnermut Ataatsimiititaliami siulittaasoq Jens Immanuelsen tusagassiutinut nalunaarummi sisamanngornerup unnukkuani allappoq.

Suliarineqartoq tatigaat
- Inatsisartut ukiakkut ataatsimiinnerannut atatillugu missingersuutinik malittarinninnermik taamaattumik Naalakkersuisut saqqummiussinissaat inatsisitigut aalajangersarneqartumik suliakkiissutaavoq. Ataatsimiititaliap isumaa malillugu Inatsisartunut qinersinissamik nalu-naaruteqarneq tamatuminnga allanngortitsinngilaq, tassa Aningaasaqarnermut Akileraartarnermullu Ataatsimiititaliaq, Inatsisartut ataatsimiititaliaannit kisiartaalluni ingerlasutut, suliassaminik isumaginnittussaammat, Jens Immanuelsen nalunaarpoq.

- Taamatuttaaq Naalakkersuisuugallartut Namminersorlutik Oqartussat susassaqarfiisa aqutsiviginissaat aammalu atorfimmi suliassat ingerlaannarnissaannut pisariaqartunik suliaqarnissaq pisussaaffigaa. Naalakkersuisoqarfim¬mi missingersuutinik malinnaaneq atuinerusoqaratarsinnaaneranik takutitsippat aningaasaliissutit eqquutsinneqarnissaannut qulakkeerinnittussanik Naalakkersuisup pisariaqartunik iliuuseqartussaanera Inatsisartunut qinersinissamik nalunaaruteqarnerup allanngortinngilaa, Aningaasaqarnermut Ataatsimiititaliami siulittaasoq Jens Immanuelsen nassuiaavoq.

Isertitassat assut isumakulunnartut
Ingerlatsinermut aningaasaliissutit, tapiissutitut aningaasaliissutit inatsisitigullu pisussaaffigalugit aningaasaliissutit missingersuutinut sanilliullugit annertunerusumik nikingassuteqarnissaat naatsorsuutigineqanngimmat 'Aningaasaqarnermut Akileraartarn ermullu Ataatsimiititaliamit tusaatissatut tiguneqarpoq'.

- Tamatuma peqatigisaanik 2014-imi tamak¬kiisumik isertitassat assut isumakulunnarnerannik Naalakkersuisut oqarnerat ataatsimiiti¬taliamit isumaqataaffigineqarpoq. Kisitsisit ajorsiartornerat kisiat eqqarsaatiginagu, aammali missingersuutit taama annertutigisumik uniorneqarsinnaanerat eqqarsaatigalugu, Aningaasaqarnermut Ataatsimiititaliaq nalunaarpoq.