naatsorsuutit
Aningaasaqarneq 2016-imi siuariapiloorpoq
2016-imi aningaasaqarnikkut siuariarnerup 7,7 procent anguaa. Naatsorsueqqissaartarfimmit kisitsisit iluarsisat tamanna takutippaat.
Tunisassiornerup nalinga 2004-imili aatsaat taama 2016-imi siuariartigaaq. Tamanna aalisarluartoqarneranik pissuteqarpoq.
Nunat tamalaat malittarisassaat
Naatsorsueqqissaartarfiup nuna tamakkerlugu naatsorsuusiarisartakkani nutarsarlugit saqqummersippai, nunat tamalaat naatsorsuusiornermut maleruagassaat nutarsagaq tassani malinneqarpoq, taanna ilaatigut EU-miit, IMF, OECD, FN aamma Verdensbankimiit suliaavoq.
Nuna tamakkerlugu naatsorsuutit utimut 2003 ilanngullugu nutarsarneqarput. Nutarsaanerup kisitsisinut sunniutai ukiumiit ukiumut nikerarput, kisianni tamarmik qaffariartinneqarput.
Naatsorsuutini kukkunerit
Naatsorsueqqissaartarfiup jannuaarip 26-ani saqqummiuppaa “Nuna tamakkerlugu naatsorsuutit 2007-2016”. Tamatuma kingorna paasinarsivoq kisitat kukkuneqartut, nalunaarusiarlu utertinneqarpoq.
- Matumani saqqummertup (16. februar) jannuaarip 26-ani saqqummersitaq taarserpaa. Pisortat ingerlatsiveqarfiini nalikilliliinerit naatsorsoqqinneqarnerisa saniatigut Aalisarnerup Inuussutissanillu tunisassiornerup tunisassiaasa akiusimasunit kisitanngorlugit nalingi, piffissami 2013-2016, iluarsiissuteqarfigineqarput. Qulaani iluarsiissutit kinguneraat BNP-mi qaffariaat 2016-imi 7,7 pct.-inngormat, Naatsorsueqqissaartarfik naqissusiivoq.