Tuesday, November 7, 2017 - 14:01

Aningaasanut inatsit amigartooqqasoq partiit eqqartorpaat

Assi.: Danmarks Nationalbank
8 million koruuninik sinneqartoornerungaluaq amerlaqqataanik amigartoornermut mumisinneqarsimavoq. Amigartoorutillu amerlanerulersinnaapput

Aningaasanut inatsit ukiup tullianimoortoq septembarip ulluisa 26-nni politikerit oqallisigimmassuk 8 million koruuninik sinneqartoorfiusussaangaluarpoq.

Oqallisigineqarneraniillu sapaatip-akunneri arfinillit ingerlanerini sinneqartoornerungaluaq 8 million koruuninik amigartooruteqarfiusoq, aappassaaneerneqarnera ullumi oqaluuserissavaat.

Pingaarnersiuinissaq ujartorneqartoq

Taamatulli pisoqarsimanera, ullumi siunnersuut inersuarmi oqallisigineqalerpat, Demokraatit oqaaseqarfiginngitsuussanngilaat.

- Siullermeerinerup aappassaaneerinerullu akornanni pisut ajoraluartumik ersarilluinnartumik takutippaat maannakkut Naalakkersuisuusut partiillu tunuliaqutaasut politikkikkut pingaarnersiusinnaanngilluinnartut, aammalu eqqortunik aalajangiisinnaannginneq eqqarsaatigilluakkanillu aalajangiisinnaannginneq inuiaqatigiinnut tamanut akisoorujussuanngoriaannaavoq, Randi Vestergaard Evaldsen ullumi oqaaseqaatissamini allappoq.

Amigartooruteqarnerulersinnaaneq

Amigartoorutigineqartulli amerlanerulersinnaapput. Sermitsiaq.AG-p oqaluttuarisimasaatut, partiinut tapiissutit partiinit amerlanerussuteqartuni taperserneqartoq, 2 million koruuninillu naleqartoq, siunnersuummi ilanngunneqarsimanngilaq.

Aamma atuaruk: 2018-imut aningaasanut inatsit sinneqartoorfiusussaangaluaq amigartoorfinngortoq

Aningaasanulli inatsisissatut siunnersuummi aalisarnermut inatsit isumalerujussuusinnaavoq. Aningaasaqarnermut Naalakkersuisoqarfiup tusarniaanermut akissuteqarluni akisunaarneqarsinnaanera aarlerisaarutigisimavaa.

Tamannalu Inuit Ataqatigiit ernumanartoqartippaat

- Aningaasanut inatsisissaq siullermeerneqarnermini kr. 8 mio.-nik sinneqartoorfiusussaangaluaq kr. 8 mio.-nik amingartoorfiusussanngortutut saqqummiunneqarpoq. Inuit Ataqatigiit pingaartipparput pingajussaanneerinninnissaq pitinnagu aalisarnermut inatsisissap tusarniutigineqarnerani nunatta karsianut sunniutigiumaagassat kr. 180 mio.-nik annertussusilerneqarsimasut ersarissumik nalornissutigineqarsinnaajunnaarlugit inatsisartunut nassuiarneqassasut, partiip oqaaseqartartua Bendt B. Kristiansen oqaaseqaammini allappoq

Aalisarnermut inatsisissaq ukiup tulliani upernaakkut ataatsimiinnermi akuerineqarnissaa naatsorsuutigineqarpoq.

Ukiut sisamat sinnerlugit amigartooruteqarnissaq

Aningaasanut inatsimmut allannguutissatut siunnersuutit taama isikkoqartillugit, ukiut sisamat sinnerlugit naatsorsuutit oqimaaqatigiinnissaannik piumasaqarneq aningaasanut inatsisissap naammassisinnaajunnaarpaa. 2018-miit 2022-mut siunnersuutigineqarsimasuni naatsorsuutit oqimaaqatigiissimangaluarput. Allannguutissatut siunnersuutit ukiut sisamat sinnerlugit ingerlanerini 27.8 million koruuninik nikingassuteqalersissavai, tassa taama amerlatigisut missaani amigartooruteqarnissaq naatsorsuutigineqarsinnaalissalluni.

Seneste nyheder / Nutaarsiassat kingulliit