Aningaasanut inatsisissatut siunnersuut: Nunarput isumagineqarpoq

Amigartoorutit 100 millioner koruunit, ataatsimut tapiissutit nikittussaajunnaarsinnikut sammisaqarfinnilu tamani aningaasatigut unammilligassat aningaasanut inatsisip ataqatigiissinnissaa ajornakusoortissinnaavaat. Taamaattumik Aningaanut Nunallu Iluani Pissutsinut Naalakkersuisumi Vittus Qujaukitsumi suli isumaqatigiinniartoqarpoq.
Taanna tusagassiorfinnut nalunaarutikkut oqarpoq partiit tamarmik tusaaniarneqartut Nunarpullu isumagineqarsimasoq:
– Kræftimut pilersaarut, sinerissami annertunerusumik sanaratorneq, ilaasunik umiarsuarnik angallassinermut suliffissaaleqinerullu akiornissaanut aningaasat amerlanerusut aammalu tamat oqartussaaqataanerisa nukittorsarnissaanut aningaasat. Tassa pingaartinneqartut Aningaasanut Nunallu Iluani Pissutsinut Naalakkersuisup aningaasassarsiffigisimasai 2014-imut Aningaasanut inatsisissatut siunnersuutip aappassaaneerneqannginnerani.
– Partiit tamaasa pitsaasumik oqaloqatigisimavakka. Tamarmik assigiinngitsunik aallaaveqaraluarput, isumaqarpungali allannguutissatut siunnersuutitigut taakkunatigut illua'tungeriit tamaasa isumagisimagivut. Tassami Kalaallit Nunaat tamaat isumagisimavarput, Vittus Qujaukitsoq oqarpoq.
– Naalakkersuisunut pingaaruteqarpoq nunami maani kikkut tamarmik atugassarisaasa pitsanngorsarnissaat. Taamaasiorpuguts sanaartorneq siammarsarlugu tamannalu peqatigalugu suliffissaaleqinerup akiorniarnera annertusillugu. Aamma nunamut tamarmut iluaqutaassaaq kræftimut pilersaarutip aallartinnissaa aningaasaleratsigu.
Tamatuma saniatigut Naalakkersuisut siunnersuuteqarput tamat oqartussaaqataanerat nukittorsarneqassasoq, taamaasiorpullu 1 mio. kr.-inik immikkoortitsillutik, kalaallilli NGO-t suliniutini angisuuni immikkut ilisimasalimmit ikiorneqarnissaminnut tassunga qinnuteqarsinnaapput.
Tamanna peqatigalugu Nuummi inissianik tuniniaaneq ukiunut amerlanerusunut siammarneqarpoq. Tamatumuuna allanngortinneqanngilaq aningaasanut inatsisip ukiunut sisamanut oqimaaqatigiittuunissaa. Tamatuma saniatigut suliniutigaa aalisarnermi ataqatigiissumik politikkeqarnissaq.
– Aalisarnermi aammalu pisuussutinik akileraarusiinermi ataqatigiissumik politikkeqarnissaq poltikkikkut atituumik kissaatigineqarpoq. Taamaattumik Naalakkersuisut piaartumik inuussutissarsiortut aningaasanillu ingerlatsiviit akulerutsinniarpaat, Vittus Qujaukitsoq oqarpoq.