Aningaasanut inatsit 2017

Aningaasanut inatsisissaq: IA isumaginninnermut aningaasanik amerlanerusunik qulakkeerinninniarpoq

- Inuusuttut suliffissaaleqinerat iliuuseqarfigineqassaaq, Aqqaluaq B. Egede isumaqarpoq

2017-imut aningaasanut inatsisissamut siammasissamut isumaqatigiinnissamik Aqqaluaq B. Egedep neriuuteqarpoq

Naalakkersuisut pingasunngornermi 2017-imut aningaasanut inatsisissatut siunnersuutaat tamanut saqqummiunneqarnissaa sioqqullugu, illuatungiliuttut Inuit Ataqatigiit Nunatta aningaasaqarneranut naatsorsuutit isumaqatiginninniutiginissaannut atatillugu suliniutissatik marluk saqqummiuppaat.

Atuaruk: Aningaasanut inatsimmut siunnersuut ullumikkut saqqummiunniaraa

Kingulerunneq
Isumaginninnermut tunngasunik annertuumik kinguleruttoqarnera iliuuseqarfigineqartariaqartoq, IA isumaqarpoq.

- Sunniuteqarusuppugut inuusuttut suliffissaaleqinerat annertuallaarujussuartup akiornissaata sunniutilimmit annikillisarnissaanut, minnerunngitsumik meeqqat isumaginninnikkut ajornartorsiuteqartut pillugit malunnaatilimmik sunniuteqartumillu aningaasaliinitsigut suliniutit iluatsittumik aallartinneqassasut, politikkikkut oqaaseqartoq Aqqaluaq B. Egede tusagassiuutinut nalunaarummi naqissusiivoq.

Suliffeqarfiit akileraarutaat apparnagu
Tamannalu pissutigalugu suliffeqarfiit akileraarutaat apparneqarnissaannut akissaqartoqanngilaq, tamanna Naalakkersuisut politikkikkut siunniussaraat.

- Suliffeqarfiit akileraarutaasa appartinnerisigut aningaasarpassuit annaaneqartussanngorlugit missingersuusiorsimammata. Isumaginninnikkut suliffissaaleqisullu pillugit suliassat salliutinneqartariaqarput, Aqqaluaq B. Egede isumaqarpoq.

Amerlanerussuteqarluartut
Oqaaseqartartup aamma oqaatigaa, partii illuatungiliuttup oqaloqatigiinnissamut assatik isaakkititk.

Atuaruk: Aningaasanut inatsisissatut siunnersuut ukiuni tallimani aatsaat sinneqartoortoq

- Inatsisartut 2017-imut aningaasanut inatsisissaattut siunnersuut tikilluaqqullugu neriuutigaarput Naalakkersuisut inatsisartuni partiit katersuuffissaqartillugit aningaasanut inatsit katersuuffiusoq taaseqatigiissutigineqartorlu angusinnaassagipput. Suleqatigiinnikkut nunatta inuisalu siunnerfeqaqatigiillutik siuarsaqatigiinnissaat kajumissuseqarluta anguniassavarput, Aqqaluaq B. Egede oqarpoq.

IA sisamanngorpat Naalakkersuisunik isumaqatiginninniarnissamut qaaqquneqarput.

Powered by Labrador CMS