Aningaasanut inatsisissamut isumaqatiginninniarneq: Aleqap danskit naalakkersuisui nersualaarpai

Kalaallit Nunaata folketingimut ilaasortaatitaasa danskit naalakkersuisuinit tusarnaarneqarnerat Aleqa Hammondimit nuannaarutigineqarpoq

Aleqa Hammond (NQ) pingasunngornermi Finansministerimut, Kristian Jensenimut (V) aningaasanut inatsisisap aappassaannik isumaqatiginninniutiginissaanut ataatsimiigiaqquneqarsimavoq.

Kalaallit Nunaata soqutigisai naapertorlugit aningaasaqarnermut ministeriusup aningaasaliissutissat saquummiuppai. Tassani danskit naalakkersuisa isumaqatiginninniutaat aamma Aleqa Hammondip (NQ) kiisalu Aaja Chemnitz Larsenip (IA) isumaqatiginninniutai saqqummiunneqarlutik.

- Aningaasanut inatsit pillugu ataatsimiinnernut atatillugu Finansministerip uangalu akornatsinni unneqqarissumik toqqaannartumillu oqaloqatigiittoqarsimavoq, Aleqa Hammond tusagassiutinut nalunaarummi allappoq.

- Uanga kissaatigaara, Folketingimi politikikkut sulinerput Kalaallit Nunaannut aamma kalaallinut Danmarkimi innuttaasunut malunnaatilimmik kinguneqassasoq. Danskit naalakkersuisuisa isumaqatiginninniarnerup annerpaartaa Folketingimi ilaasortat tusarnaarsimavai, oqaatsillu iliuuseqarnermi kinguneqartinnissaannut piumassuseqartoqarpoq.

Eqqartuussiveqarnikkut illersuinermi atuuffiup nukittorsarneqarnissaanut 3,5 mio. kruunit aningaasaliissutit qaavisigut aningaasaliissutigineqartut Sermitsiaq.AG-mit allaaserineqareerpoq. Taakku saniatigut Kalaallit Nunaanni pinerluttaalisitsinerup iliuuseqarfiginerata nukittorsarnissaannut 5 mio. kruunit aningaasaliissutigineqarput.

Kalaallinut ilinniagaqartunut aasaanerani ilinniagartuutut oqaatsit atorneqartarnerat aamma danskit ilinniartuunermi kulturiat pillugu pikkorissartitsinissamut Kalaallit Illutaannut 8 mio. kruunit immikkut nalunaaquserlugit aningaasaliissutigineqarput.
Kalaallinut inuusuttuaqqanut ilinniartunut imaluunniit ingerlaqqittumik ilinniartunut sukumiisumik danskisut pikkorissarnissamut 12 mio. kruunit aningaasaliissutigineqarput, Naalagaaffeqatigiit akimorlugit ilisimasaqarnerulernissap nukittorsarnissaanut 30 mio. kruunit aningaasaliissutigineqarput, kiisalu Kalaallit Illuinut akuliutsitsiniarnerup sivitsorneqarnissaanut 4 mio. kruunit aningaasaliissutigineqarput.

Powered by Labrador CMS