Aningaasanut inatsit
Aningaasanut inatsisaagallartussap sulerianeqara illuatungiliuttunit isornartorsiorneqarpoq
Utaqqiisaasumut aappaagumut aningaasanut inatsip allanngortinneqarnera illuatungiliuttut isornartorsiorpaat
- Aningaasatigut inissisimanerput eqqarsaatigalugu utaqqiisaagallartumik aningaasanut inatsisiliornissaq ajorinngilara. Taamaallaat taassumunnga tunngatillugu akuerinngilara isumaa tunngatillugu aningaasartuutissanik ilaseqqinnissamik allannguutitut siunnersuutit. Nutaanimmi ilassutissalersornani aningaasanut inatsisaareersoq nangeqqiinnagassaagaluarmat.
Inuit Ataqatigiit tunuliaqutaralugit Inatsisartuni ilaasortaq Naaja Nathanielsen KNR-imut oqarpoq.
Inatsisartuni immikkut marlunngornermi ataatsimiittoqarnerani isornartorsiuivoq.
Naalakkersuisut Inatsisartut oqallitseqqaarnagit sulisikkusuppaat. Tamanna aamma Partii Naleqqamit isornartorsiorneqarpoq.
'Pitsaanerusariaqarpoq'
Aappaagumut utaqqiisaasumik aningaasanut inatsisaagallartussap allanngortinnissaata saniatigut Kommunini aappaagu milliunilippassuarnik nalimmassaanissaq Naalakkersuisooqatigiilersut Inatsisartunit iperarneqarnissaa piumasaraat.
- Ajorpallaarpoq aningaasaqarnermut ataatsimiitsitaliap nunatta aningaasatigut inissisimanera qanoq innersoq ilisimanagu aalajangiissasut. Suli ataatsimiissimannginnatta siunnersuutaagallartumut attuumassuteqartussanik aningaasanik ilassutissanik qinnuteqartoqarsimanersoq ilisimanngilarput, Naaja Nathanielsen KNR-imut oqarpoq.
Aningaasanut inatsisissap suliarineqarnissaa ataatsimiititaliani suliarineqartariaqanngitsoq Siumut, Demokraatit Atassutillu amerlanerussuteqarlutik aalajangerpaat.