kingusinaarneq
Aningaasanut inatsimmut IA-mit suleqataaffigineqartut takukkit
Naalakkersuisooqatigiit aningaasanut inatsisissatut siunnersuutaat annikitsunik iluarsisaqarsimasuuppat illuatungiliuttuni partiini annersaat siunnersuummut taaseqataasimassagaluarput
Inatsisartuni marlunngormat oqallinneq aaqqiagiinngiffiusorujussuuvoq. Taamaakkaluartoq aningaasanut inatsisissap pingajussaa taasissutigineqalinnginnerani arlaleriarluni isumaqatiginninniartoqarpoq.
Inuit Ataqatigiinnit suleqataaffigineqartut ataani atuarneqarsinnaapput:
Nunatta arsaattarfissuartaarnissaanut pilersaarut Inuit Ataqatigiinnit utaqqimaarneqarusuppoq: Illoqarfimmi sumiiffissarsereernagu ukioq mannamut 1 million koruuninik aningaasalerneqarnissaa IA-mit annertugineqarpoq. Suliarineqarnissaanut paasiniaaffigissallugu 600.000 koruunit ukioq mannamut naammassasut partii isumaqarpoq.
Nunalerinermut aningaasartuuteqarpallaarneq: Nunalerinermut ataatsimiititaliarsuup inassutai piviusunngortinneqassappata 190 millioninit 240 million koruunillu akornanni aningaasaliissutigineqartariaqassapput. Aningaasanut inatsimmi 6 million koruunit ilassutaapput.
Naalakkersuisut inissianik sanaartornermut sipaarniarnertik attatiinnarmassuk IA-mit ajuusaarutigineqarpoq: Inip inissiaataanik iluarsaasseqqinnissanut Naalakkersuisut aningaasaliinerat nuannaarutigaat. Utoqqarnut inissialiortoqarnissaa kiisalu ilinniartut ineqarfigisartagaannik sanaartortoqarnissaa IA-mit nuannaarutigineqarpoq.
Great Greenlandimut 15 million koruuninik tapiineq annertuallaarpoq: Aningaasanut inatsimmi 2015-moortumi Great Greenlandip 15 million koruuninik aningaasalerneqarnissaa Naalakkersuisunit aalajangerneqarpoq. Tapiissutaasut 13,5 million koruuniunissaat IA-mit siunnersuutigineqarpoq.
ICC-mut aningaasaliisoqarsimasinnaasoq: 1,5 million koruunit ICC-mut aningaasaliissutaasimasinnaagaluartut Inuit Ataqatigiit siunnersuutigigaluarpaat. ICC-mut tapiinerit ukiumut annikillisikkiartuaarneqarnerat tassuuna pinaveersaartinneqarsimasinnaagaluartoq illuatungiliuttunit oqariartuutigineqarpoq.
Avaleraasartuut: Avaleraasartuunut akitsuut IA-mit siunnersuutigineqarpoq nunaqavissunut avataaneersunullu assigiinngissitaartinneqarnialernissaa, tamanna Naalakkersuisooqatigiinnit isumaqatigineqarpoq.
Peqqinnissaqarfiup sipaarfigineqannginnissaa: Qaanaami, Qasiginiannguani Ittoqqortoormiinilu nakorsat ikilisaaffigineqarnissaagaluat peqqissutsimut naalakkersuisuugallartumit Martha Lund Olsenimit siunnersuut tunuartiinnarneqarpoq. Napparsimaveqarfinni allani nakorsanik arfineq marlunnik ikilisaasoqarnera IA-mit isorineqarpoq.