isumaqatigiissut
Aningaasanut inatsimmi allassimasut takukkit
Partiit isumaqatigiissuteqartut ilaatigut Piareersarfinnut 23 millionit koruuninik tapiissutitik ilaniarlugit aalajangiuppaat
Annonse
Aningaasanut inatsit isumaqatigiissuterpassuarnik sipaarutissanik imaluunniit assigiinngitsunut tapiissuteqaqqinnernut katitigarujussuuvoq.
Siumut, Demokraatit aamma Atassut 2016-mut aningaasanut inatsimmut isumaqatigiissutigisaannit takussutissat ersarissut uani atuarsinnaavatit.
Takussutissat pingasunngornermi tusagassiortunik katersortitsinermi saqqummiunneqarput, tassani aningaasaqarnermut naalakkersuisoq, Vittus Qujaukitsoq (S) aningaasanut inatsimmi qulequttat pingaarnerit saqqummiuppai.
Aalisarneq piniarnerlu
- Immikkut 1 millionit koruuninik Pinngortitaleriffimmut tapiissuteqartoqassaaq, avataani aalisarnermik ineriartortitseqataasussamik, assersuutigalugu avaleraasartoorniarneq.
- 2016-imi aalisarnermut inatsisit iluarsaanneqassaaq. Tamassuma sinerissap qanittuani aalisarneq akilersinnaaleqataatissavaa. Suliffissanik pilersitsisoqassaaq, inuussutissarsiorfimmi isertitaqarnerit, aammalu akileraarutitut akitsuutitullu ittunik pisortanut isertitaqarnerit.
Ilaqutariinnermut tunngasut
- Ukiumut 2,5 millionit koruuninik meeqqanut inuusuttunullu isanngiitsunut siusinaartumik iliuuseqarluni siuliniutinut immikkoortinneqarput. Suliniutit 'Inuusat atorlugit sungiusartitsineq' aamma 'Meerartaarnissamut piareersarneq' aningaasaliiffigineqarput, tassani ilaqutariit meerartaartussat immikkut ittunik pisariaqartitallik siunertarineqarput.
- 2016-mi 3,6 milionit koruunit aammalu 2017-mit 2019-mut ukiumut 4,4 millionit koruunit kommuunini inunnut isumaginnittoqarfinni nakkutiginninnermut nukittorsaanissamut immikkoortitsisoqarpoq. Kiisalu suliaqarfiusumi piginnaasaqarnermik pisinnaasoqarnermillu annertusaasoqassaaq.
Ilinniarneq aamma suliffissaqarneq
- 2016-mut aningaasanut inatsimmi immikkut 23 millionit koruuninik 2015-mut sanilliullugu Piareersarfimmut aningaasaliisoqassaaq, taamalilluni 72,5 millionit koruunit aningaasaliissutaassapput. Taakkua inuusuttut amerlavallaat suliffeqarfimmi imaluunniit ilinniagaqarfiusumi inissisimaffeqannginnera aaqqiivigeqataatissavaat.
- Agguaassassat nutaat 3 millionit koruunit ikaarsaarfittut pilersitanut, inuusuttunut suliffeqanngitsunut atugassarineqassapput.
Peqatigiiffiit allallu
- Ilinniartut kattuffiat Avalak 200.000 koruuninik annertunerusumik pissarsissapput, tapiissutit katillugit 400.000 koruuninngussallutik.
- Inuit Issittormiut Siunnersuisooqatigiiffiat ICC, ukiut tamaasa aalajangersimasumik 3 millionit koruuninik pissarsisalissaaq. Kingornatigullu tapiissuteqarnermut naatsorsuutit tamanut ammasuutitaassapput.
- Tusagassiorfinnut ingerlatsinermut tapiissut nutaaq ukiumut 500.000 koruunit.
Kommuuninut sillimmatit annertunerusut
- Siumut, Demokraatit aamma Atassut Inatsisartuni ineqarnermut tapiissutit-, sioqqutsisumik utoqqalillunilu soraarnerussutisianut aaqqissuusseqqinnernik aalajangiinernut atatillugu isumaqatigiissutigaat kommuuninut sillimmatit 3 millionit koruuninik amerlineqassasut. Aningaasat kommuunini aaqqissuusseqqinnerit kivitsiffigissavai.
Sipaarniarnerit
- Ingerlatsinnermut tapiissutinullu aningaasaliissutini tamani Namminersorlutik Oqartussat 2016-imi 1 procentimik, aammalu ukiuni missiliorfinni 2 procentimik sipaaruteqassapput. Tassanili peqqinnissaqarfik, Inatsisartut, aamma kommuninut tapiissutit - ilinniagaqarfillu affaannarmik eqqorneqartoq pineqanngillat. Sipaarniarnerit ilaatigut siunnersuisartunik avataaneersunik aqutsilluarnikkut, eqaannerusumik akikinnerusumillu Namminersorlutik Oqartussani IT-mik ingerlatsinikkut pissapput.