inuiaqatigiit
Aningaasanoorajunneq phd-nngorniutigilerpaa
Soraarummeerusiami eqqartorneqarpoq aningaasanoorajunnerup annertussusaa aamma imigassartornerup hashimillu atornerluinerup peqqinnissamut sunniutai ukiut qulikkaat kingulliit ingerlanerani ineriartupiloorsimanerup kinguneri
Kalaallit Nunaanni inersimasut pinnguarnermik ajornartorsiuteqartut pillugit Christina Viskum Lytken Larsen sisamanngornermi ulloq 16. januar ph.d.-nngorniuteqassaaq. Ph.d.-nngorniuteqarnermi Kalaallit Nunaanni 2005-imiit 2010-mut Innuttaasunik Misissuinermi paasissutissat tunngavigineqarput.
Ph.d.-nngorniuteqarnerup ilaatigut takutippaa atornerluineq kisimi ingerlanneqarneq ajortoq, Kalaallit Nunaanni pinnguarnermik ajornartorsiuteqartut aamma imigassamik hashimillu atornerluisartuusut. Tamanna pingaartumik angutinut atuuppoq.
Taamaammat pinnguarnermik ajornartorsiuteqartarnerup siunissami innuttaasut peqqissusaat pillugu periusissiani, katsornissaanermi akuliuttarnermilu aaqqissuussamik ilanngunneqartarnissaa ph.d.-nngorniuteqarnermi tunngavilersorneqarpoq, tassa pinnguarnermik ajornartorsiuteqarneq allatullu atornerluisarneq imminnut atanerat annertungaatsiarmat.
Aningaasannanniarluni pinnguartoqaraangat, tamanna ataasiakkaanut aammali ilaqutariinnut sumiiffinnilu innuttaasunut aningaasatigut inuttullu atukkatigut ajornartorsiuteqarnermik kinguneqarsinnaavoq. Nunani avannarlernut sanilliussigaanni nunatsinni innuttaasut piffissap ilaani pinnguarnermik ajornartorsiuteqartut amerlangaatsiarput.
Ph.d.-nngorniuteqarnermi tikkuarneqarpoq pinnguarnermik ajornartorsiuteqartut amerlangaatsiarnerat – aamma innuttaasut peqqissutsimik ajornartorsiutaat allat, soorlu imigassamik hashimillu atornerluineq, inuiaqatigiit ukiuni qulikkaanni kingullerni sukkasuumik ineriartorsimanerat tunngavigalugu isigineqartariaqarpoq, tamannalu ataasiakkaanut inuiaqatigiinnullu inuttut atukkatigut kulturikkullu piumasaqaateqarfiuvoq.
Taaguummi pinnguarnermik ajornartorsiuteqarneq pineqarput pinnguarnermik pinngitsuuisinnaannginnermut tunngatillugu ajornartorsiutit annikinnerit annertunerillu. Taaguut ajornartorsiutip annertussusia paasisaqarfiginiarlugu innuttaasunik misissuinerni annertunerusuni atorneqarajuttarpoq. Pinnguarnermik ajornartorsiuteqartut taamaalillutik nakorsat naliliinerat tunngavigalugu ludomaniusariaqanngillat.
Christina Viskum Lytken Larsenip ph.d.-nngorniutini uani Statens Institut for Folkesundhed, SDU, Øster Farimagsgade 5A, 2. sal, København K sisamanngornermi ulloq 16. januar 2014 nal. 14 ataatsimiittarfimmi angisuumi illersussavaa.