Aningaasanik amigartoorujussuarnissaq Olsvigimit isornartorsiorneqarpoq

Aningaasaqarnermut naalakkersuisuungallartoq Vittus Qujaukitsoq, Siumut, Sermitsiaq.AG-mut ataasinngornermi annertunerusumik paasissutissiisinnaanani ilisimatitsivoq aningaasaqarnermut ataatsimiisitaliaq suli paasissutissiiffigineqarsimanngimmat.

Kisianni Nunamut namminermut Aningaasaqarnermut Nunamullu Namminermut Naalakkersuisoqarfik 'Missingersuutinik malittarinninneq Septemberi 2014'-mi saqqummiussaani atuarneqarsinnaavoq nunatta karsia 275 million koruuninit amerlanerusunit 2014-mi amigartooruteqarnissaa naatsorsuutigalugu saqqummiuppaa, taanna novembarip 17-ani saqqummiunneqarpoq.

IA: Pisoq erloqinarpoq
Inuit Ataqatigiit siulittaasuata Sara Olsvigip nunatta karsia 275 million koruuninik amigartoornissaanik saqqummiunneqartoq erloqinartutut isigaa.

- Kisitsit aatsaat peqqammerpara, amigartoortoqarujussuarnissaa ernumassutigisareerpara. Toqqaannartumik oqarusuppunga. Isertitarineqartussatut naatsorsuutigineqartut aningaasaqarnermut inatsimmut ilaatinneqarsinnaanngillat, taamaasiornikkut Naalakkersuinerluttoqartarpoq, Sermitsiaq.AG-mi chatsikkut apeqqarissaarfigineqarnermini aningaasaqarnerup inissisimanera pillugu isummeqquneqarami Sara Olsvig akissuteqarpoq.

Naalakkersuisuutitaqalertussat aningaasaqarnerup ilorraap tungaanut saatitsiniartussaasut Inuit Ataqatigiit siulittaasuata oqaatigaa.

- Kalaallit Nunaata aningaasaqarnera ilorraap saatinnissaanut uagut (Inuit Ataqatigiit) sulinissatsinnut piareersimavugut. Amigartoortoqartannginnissaa sulissutigissavarput. Suliassaq oqitsuinnaanngilaq, aningaasaqarnerup inissisimanerali ilorraap tungaanut saatinnissaa siuttuuffigerusupparput.

Aningaasaqarnermut naalakkersuisuungallartoq Vittus Qujaukitsoq tusagassiortunik katersortitsissaaq pingasunngornermi nalunaaqutaq 15.00. Sermitsiaq.AG tassani malinnaassaaq.

Inatsisartunut qinersisoqassaaq tallimanngorpat.