Sunday, March 19, 2017 - 12:11

Aningaasaliiniartut Kalaallit Airports utaqqivaat

Suli aningaasaliinissamik neqerooruterput atuuppoq, Siemens Grønlandimi pisortaq oqarpoq, Ilulissani Nuummi Qaqortumilu Kalaallit Airportsip misissueqqaarnerisa naammassinissaata utaqqinerani.
Assi.: Mittarfeqarfiit
Suli aningaasaliinissamik neqerooruterput atuuppoq, Siemens Grønlandimi pisortaq oqarpoq, Ilulissani Nuummi Qaqortumilu Kalaallit Airportsip misissueqqaarnerisa naammassinissaata utaqqinerani.

Ingerlatseqatigiiffiit Siemens Grønlandip, MT Højgaardip Unipensionillu suleqatigiiffiat ukiarmi Nuummi, Ilulissani Qaqortumilu mittarfliornissamik suliniutini aningaasaliiniarluni neqerooruteqarpoq.

Neqeroorut taanna suli atuuppoq, Siemens Grønlandimi pisortaq Carsten Uhrenfeldt Dahl oqarpoq, erseqqissarpaalu Siemensip aamma suliassap tamakkiisup ilaataluunniit avinnissaa isumaginiaraa apeqqutaatillugu suliassaq suunersoq. 

– Kalaallit Airportsimi pisortaq Steffen Ulrich-Lynge marsip aallaqqaataani Danmarkimi ataatsimeeqatigaarput pilersaarutit misissuinerillu ingerlanneqartut sumut killinnersut paasiniarlugu. Naatsorsuutigaarput apriilimi paasinarsissasoq oqaatigineqarsinnaalersimassalluni Ilulissani, Nuummi Qaqortumilu mittarfiliornissani sumut ingerlasoqassanersoq. Suliassaapput pissanganartut, neqerooruterpullu suli atuuppoq. Ingerlatseqatigiiffiit suleqatigiiffiata Siemens Grønlandip, MT Højgaardip Unipensionillu saniatigut periarfissaavortaaq suliassat ilaasa naammassinissaannut Siemensiinnarmik isumaqatigiissuteqarnissaq, pisortaq Carsten Uhrenfeldt Dahl oqarpoq. 

Atuaruk: Mittarfinnik alliliisoqarnissaq kommuneqarfiit marluk aallartipallakkusuppaat

Mittarfik nutaaliaasoq 

Siemens nunarsuarmi suliffeqarfiit teknologimik suliaqarfiit annersaasa ilagaat nunarsuarmi tamarmi 350.000-inik sulisoqarluni. 

Siemens ilaatigut Tysklandimi, Hollandimi Indiamilu mittarfiliornerni annertuuni arlalinni pingaarnersut entrepreøriusimavoq, ilaatigut teknologimi nutaaliornissaq sammineqarluni soorlu nukimmik atuinerup pitsaanerulernissaa, isumannaallisaaneq, biilinik inissiinermi imminut kiffartuunnissamik aaqqissuussinerit, qimuttuitsunut mittarfillu akornanni attaveqarneq. 

– Suliniutip teknologimut atatillugu qanoq nutaaliaatiginissaa uagutsinnut pingaartupilussuuvoq. Teknologi nutaanerpaaq atorniarneqarpa imaluunniit ileqquunerusunik suliniartoqarniarpa beton atorlugu. Siullermi pingaarnertut entreprenøriusinnaavugut aappaani annermik suliakkerneqartutut pilersuilluta, Carsten Uhrenfeldt Dahl oqarpoq. 

Kalaallit Airportsimi siuliaasup nutaap savalimmiormiup Johannus Egholm Hansenip uppernarsarpaa teknikkikkut misissueqqaarnerit pilersaarutit malillugit ingerlasut, aningaasaliisussanillu oqaloqateqarneq apriilimi aallartissalluni. 

Atuaruk: Kalaallit Airportsimi siulittaasoq nutaaq

Allaserineqartoq tamakkerlugu Sermitsiaq aviisimi kingullermi saqqummertumi atuarsinnaavat. Aviisi uani pisiariuk:

Seneste nyheder / Nutaarsiassat kingulliit