Aningaasaateqarfik aningaasaateqarluartoq qinnuteqartussanik ujartuisoq

Danskit aningaasaateqarfianni aningaasaateqarluartumi, Bikubenfondenimi, 30 millionit koruunit sinneqartut agguaanneqarnissaaannut tunngatillugu Kalaallit Nunaat Danmark assigalugu ilaavoq, aningaasaateqarfiup ukiut tamaasa inuusuttut ajornartorsiortut ikiorniarlugit suliniutinut taakku atortarpai.

Kisianni qinnuteqartut amigaataapput.

- Kalaallit Nunaannit qinnuteqaatinik amerlanngitsunik pissarsisarpugut, Bikubenfondenip isumaginninnermut pisortaa, Stine Egede, Sermitsiaq.AG-mut oqarpoq.

Aningaasaateqarfik ukiumut tallimat 15-illu akornanni inuusuttunut inuuniarnermikkut annertuumik ajornartorsiortunut ikiuisinnaasunik suliniutinut tunngasunik qinnuteqarfigineqartarpoq.

Suliniut 'Siunissaq uagut pigaarput - The Future Belongs to Us' qinnuteqartut ilagaat. Suliniut 2015-imi ukiut pingasut ingerlanerini 4.260.000 koruuninit ikinnerunngitsunik immikkoortitsiffigineqarpoq. Meeqqat inuussuttullu Tasiilameersut Nanortalimmeersullu eqqumiitsuliornikkut kulturikkullu nukittorsarneqarnissaat suliniutip ilaatigut siunertaraa.

Atuaruk: Tasiilami inuusuttut nakuuserneq innarliinerlu akiorniarpaat

Siornatigut aamma meeqqat oqallittarfiat, inuusuttunik 14-init illoqarfinnit nunaqarfinniillu qulineersunik inuttaqartoq, 1.600.000 millionit koruuninik tunissuteqarfigineqarnikuuvoq.

Taamaakkaluartoq aningaasaateqarfiup suli qinnuteqartoqartarnissaa kissaatigaa.

- Qinnuteqaasiornerup ajoraluartumik pisariusarnera unammillernartuuvoq, taamaattumillu tamatumunnga assersuutigalugu siunnersuisalissanerluta isumaliutigaarput, piukkunnartunik qinnuteqartoqarsinnaanerussagatta, Stine Egede Bikubenfondenimeersoq oqaluttuarpoq, tassani isumaginninnermut tunngasumi inuusuttut atugarliortut 13-nit 30-it tungaanut ukiullit ukkatarineqarput.

Ataatsimut isigalugu kinguaariinnut peroriartortunut suliniuteqarnissamut aningaasanik pisariaqartitsineq annertoorujussuuvoq. 2017-imut aningaasanut inatsimmi akuerineqaqqammersumi Naalakkersuisut suliniuteqarneq salliutippaat - aningaasaliissutillu - tassungarpiaq tunngasut, taamatullu danskit meeqqanut inuusuttunullu tunngatillugu 2017-imi agguaattagaanni 10 millionit koruunit immikkoortinneqarnikuupput.

Atuaruk: Aningaasanut inatsit piareerpoq

Suliniuteqarluni Bikubenfondenimut aningaasanik qinnuteqaraanni, ukiup affaa tikillugu qinnuteqaammut akissutisinissaq naatsorsuutigineqartariaqarpoq.