aningaasaateqarfiit
Aningaasaateqarfiit taarsigassarsiaqartitsinerulersimapput
Aningaasaateqarfinnut taarsigassarsiniartarneq ajornannginnerorpasilersimavoq. Aningaasaateqarfiit Nunatsinni 2. kvartalimi anigaasaateqarfiit taarsigassarsiarititat amerleriartissimagai, Naatsorsueqqissaartarfiup kisitsaasa nutaat takutippaat.
Kisitsisit aningaasaqarnermut pissutsit pillugit naatsorsuinermit erserput, 2016-milu piffissap taamaasinerani taarsigassarsiarititat 5,5 procentimik qaffariaateqarsimapput, tassa aningaasat taarsigassarsiaritinneqartut massakkut 3.855 million koruuniullutik.
Aningaasaqarnermut pissutsinut naatsorsuinermi nunatsinni aningaasaqarnikkut qanoq inissisimanitsinnut takussutissaasinnaavoq.
Aningaasat 2. kvartalimi aningaaserivinni uninngasuutitat 6.031 million koruuniusimapput, tamannalu ukioq kingulleq piffissap taamaasineranut sanilliullugu 0,9 procentimik annikinneruvoq.
Naatsorsuineq massakku naammassineqarsimanngilaq. Naatsorsueqqissaartarfiup paasissutissiaraa Royal Arctic Line-p qarasaasiatigut ajornartorsiuteqarnera pissutaalluni assartukkat pillugit naatsorsuisoqarsinnaasimanngitsoq. Taassuma saniatigut eqqussinermi akitsuutinut paasissutissat tunniunneqarsimanatik.