Anngunniunneq
Angutit unammisartut VM-imut anngunniunniutilersut
Cuba aamma Mexico anngunniulluni USA-mi peqaatanissamut pisinnaajunnaarlutik nalunaarput. Taamaallillutik angutit assammik arsartartut De Pan Amerikanske Mesterskabimut toqqaannartumik anngupput, taanna VM-imut anngunniunneruvoq
Angutit nunanut allanut unammisartut De Pan Amerikanske Mesterskabimut peqataanissamut piareerput - anngunniuteqqaanngikkaluarlutik.
De Pan Amerikanske Mesterskabimut peqataanissamut Cuba aamma Mexico pisinnaajunnaaramik Kalaallit Nunaat peqataassaaq. Anngunniunneq siulleq USA-mi Alabamami marsimi ingerlanneqartussaagaluartoq taamaatinneqarpoq.
Unamminissamik pisariaqartitsisut
Naak toqqaannartumik De Pan Amerikanske Mesterskabimut anngukkaluarlutik, unammisartut unamminngitsoornerat sungiusaasup Niels Møllerip ugguaraa.
- Pitsaanerutissagaluarpara anngunniunnermi siullermi unammereerluta De Pan Amerikanske Mesterskabimut anngussimasuugutta, taanna Sermitsiaq.AG-mut oqarpoq.
Tassami unammisartut unamminertik iluaqutigissagaluarmassuk.
- Unammisartut arlallit Nunatsinni ulluinnarni arsartartuupput. Inuusupput unamminermillu misilittagaqarnissamik amigaateqarput. Pilersaarutigullu massakkut allanngortittariaqalerpagut, nunanut allanut unammisartunut sungiusaasoq Niels Møller oqarpoq.
Atuaruk: Nunanut allanut unammisartut uku toqqarneqarput
Argentinami unammissapput
De Pan Amerikanske Mesterskabimi holdit pingasut pitsaanerit nunarsuarmi pissartanngorniunnissamut ingerlaqqissapput, taanna januaarimi Frankrigimi ingerlanneqassaaq.
- VM-imut anngunniukkaangatta holdit tallimat pitsaanerpaat akornanniittuaannassaagut. Pitsaanerpaat pingasut akornaniinnersugut maanna oqaatigissallugu siusippallaarpoq, Niels Møller oqarpoq.
De Pan Amerikanske Mesterskabit juunimi Argentinami illoqarfiit pingaarnersaanni Buenos Airesimi ingerlanneqassapput.
Atuaruk: Amerikap Nunavissuani pissartanngorniunnissamut sungiusaasoq piareersarpoq