Angutit sungiusaasuat: Assammik arsartarneq allanngorfissaminiippoq

Angutit assammik arsartartut nunanut allanut unammisartut sungiusaasuat Ingi Olsen, nunatsinni pissartanngorniunnerit qaangiuttut naliliiffigai.

Ingi Olsen, angutit assammik arsartartut nunanut allanut unammisartut sungiusaasuata, assammik arsarluni pissartanngorniunnerit ippassaq sapaammi naammassisut isiginnaaqqammerpai.

Timersuut ineriartornermut atatillugu allanngorfissaminiittoq, taanna oqarpoq.

- GM-imi arsarnerup qaffasissusaa ajunngilaq, kisianni assammik arsarneq ineriartortinniarlugu iliuuseqartoqanngippat, siunissaq ilungersunarsinnaavoq. Siorna pissartanngorniuttoqarneranit ukiormanna pissartanngorniuttoqarnera allannguuteqarfiuallaanngilaq, Ingi Olsen, Sermitsiaq.AG-mut taama oqarpoq.

Pissartanngortut GSS nersualaarpai, taakku sapaatiummat qulingiluassaanik tulleriiginnarnik pissartanngorput.

- Iligiit pitsassuarmik sungiusartarnermikkut kultureqarput, tamanna iligiit allat ilikkagaqarfigisinnaavaat. Taamaattumik timersoqatigiiffiit tamarmik, timersoqatigiiffiit pissartanngorniunnermut peqataanngitsut ilanngullugit, akisussaaffimmik tigusillutik qanoq ingerlariaqqinnissartik pilersaarusiussavaat. Tassami sungiusaasutut ilinniarsimaneq, aammalu timersoqatigiiffiit timersuutip inuusuttunit allanik toqqaanatik qanoq toqqarneqartarnissaa isumagineqarnissaa pisariaqartinneqarpoq, Ingi Olsen erseqqissaavoq.

Nunanut allanut unammisartut sungiusaasuata timersoqatigiiffinnik naliliinera:

GSS:

- Iligiit timersoqatigiiffinnit tamanit timimikkut nukittunerpaapput, unammisartuilu pitsaanerpaapput. Pissartanngorniunnermi angusarissaarnissaat ersarippoq.

Nagdlunguak:

- Iligiit nukittuunik arsartugissaarput, inuusuttut aamma angajulliit akuleriilluarput. Kisianni qasujaannerusuugunik GSS unammillernerusinnaagaluarpaat. Qasujaassorinngilakka.

Norsaq HC:

- Aallartilluarput, kisianni ajoqusernernik eqqorneqarput. Inuujuk Ostermann-Søholm ajoqusermat iligiit annertuumik annaasaqarput. Iligiit arsartorpassuatik annaanikuuaat, taamaalillutik pitsaassuseq attassinnaanagu. Kisianni sukkasuunik aamma teknikkigissunik amerlasuunik arsartoqarput, oqimaassutsimilli amigaateqarput. GSS-imut imaluunniit Nagdlunguamut unammigaangamik illersuisut qaangersinnaaneq ajorpaat.

NÛK aamma SAK:

- Iligiit naatsorsuutigineqarsinnaasumik peqarput. Sungiusaqqinnerulaartariaqarput. Arsarneranni kukkuluttornerit amerlavallaarput. Pitsaanerpaaffii aamma ajornerpaaffiilu nikingasorujussuupput. Illersuinerminni ajornerpaagaangamik isertitsiffigineqangaatsiartarput. Ajornerpaaffitsik pitsanngortittariaqarpaat – arsarfimmi aamma timigissartarfimmi sungiusarnerusariaqarput.

Team Sermersooq:

Nalilerneqanngillat.

Powered by Labrador CMS