Angutit sungiusaasuat: Imatut kuultinnassaagut

Sermitsiaq.AG-p siusinnerusukkut allaaserisaatut arsaalluni nunanut allanut unammisartut anføreriat Nukannguaq Zeeb isumaqarpoq Kalaallit Nunaat Island Gamesimi, Den Engelske Kanalimi qeqertami Jersey-mi ingerlanneqartumi, ajugaasussat ilaattut ilimagineqartoq.

Nunanullu allanut unammisartut sungiusaasuat Tekle Ghebrelul isumaqataavoq.

– Ukiut kingulliit marluk eqqarsaatigalugit qularnanngilluinnarpoq maaniittugut unammiuaarnermi ajugaaniarluta. Ukiut marluk matuma siornatigut finalimi Bermudamut ajorsaqqarpugut, tamannalu sivisuumik anniaatigisimavarput. Medalje-nassaagut, kuultinnanniarpugullu, Tekle Ghebrelul Sermitsiaq.AG-mut oqarpoq.

– Unammisartut timigissartarfimmiittartorujussuusimapput. Ukiut marluk matuma siornatigut Bermudami Island Games-eqarnissaata tungaanut sungiusartarsimanermut sanilliullugu tamatumuuna annertunerujussuarmik sungiusartarsimavugut. Anguniagalimmik sungiusarsimavugut, kikkut tamarmik assigiissumik sungiusartarlutik. Uagutsinnit pinngitsoorani piumasarisimavarput taama sungiusartartiginissaat, tamannalu malissimavaat, kalaallit angutit arsaalluni nunanut allanut unammisartut sungiusaasuat oqaluttuarpoq.

Kalaallit Nunaata unammisartui medalje-nassanngikkaluarpata tamanna iluatsitsitsinngitsoornertut taajumanngilaa.

– Qularnanngilarli, uanga nammineq pakatsissaanga naatsorsuutigisatsitut pisoqanngippat. Iluatsitsinngitsooruttali soorunami uanga tamanna pisuussutigissavara, Tekle Ghebrelul oqarpoq, sungiusaasutullu ikiortini René Olsen, unammiuaarnermi peqataasinnaasimanngitsoq, inuulluaqquvaa.

Akerassatik ilisimanngilai

Nunanut allanut unammisartut sapaatiuppat siullermik unamminerminni Menorca unammissavaat.

– Akerassavut ilisimasaqarfigivallaanngilakka, tamannali pillugu assistentera oqaloqatigisartorujussuusimavara. Nalunngilarali Menorcap unammisartui teknikeriusut, uagutsinnullu naleqqulluarpoq Menorcap unammisartui timikkut nukittuujunngimmata, nunanut allanut unammisartut sungiusaasuat oqarpoq.

Nangipporlu:

– Saassussiniartuussaagut akeqqavullu siusissukkut naapittarlugit. Taktikkerissavarput arsaq tigummissagipput unamminerlu aqullugu. Arsaq sapinngisamik tigumminiassavarput. Periarfissaqalerutta saassusseriataassaagut, unamminerli tigummissavarput sulilluartorujussuulluta, Tekle Ghebrelul oqarpoq.

Taktikki allanngortillugu

Ukiuni kingullerni unammisartut 4-4-2 atortarsimavaat, sungiusaasulli unammeriaaseq 4-3-3-mut allanngortissimavaa. Taanna saassussiniarnarneruvoq kingukkaallu siuarsimanerullutik.

– Unammeriaaseq unammisartut sungiusarnerni sammisimavaat. Akeqqat arsaq annaagaangassuk ingerlaannavik saassusseqqittoqartassaaq, Tekle Ghebrelul nassuiaavoq.

Peqatigiinnerallu aatsaat taama pitsaatigaaq, taanna nassuiaavoq:

– Unammisartut unnuit tamaasa imminnut aliikkusersortarput namminneq nassaaminnik. Gokart-ertarsimavugut, unammisartoqatigiit peqatigiissarlugit. Nuannersorujussuuvoq. Nuanneqaaq takullugu akimorlutik nuannisaqatigiittarnerat. Imminnullu isumaginiartartorujussuupput, Tekle Ghebrelul nassuiaavoq.

Unammisartut pingasut immikkoorput

Unammisartut pingasut, holdip kakkattorisaatut erseqqissaatigai, aternilli taasiumanngilaq.

– Unammisartut tamarmik arsarluaqaat. Unammisartulli pingasut immikkoorput. Tarnikkut piginnaasaqarluarput, kakkannerulluinnarpullu. Unammisartut taakkua pingasut angusaqarusoqaat, tamatigullu ajugaaniarlutik unammisarlutik. Imminut naalakkersinnaapput, tamatigulli taamaattarpoq, ilaat immikkooruteqartarput, angutit nunanut allanut unammisartut sungiusaasuat oqarpoq.

Qeqertamilu atugassarisat naammagisimaarpai.

– Bermudamiinnitsinnit pitsaanerujussuuvoq. Ullumi (sisamanngornermi, aaqqiss.) marloriarluta sungiusarpugut, nerisassat pitsaalluinnartuupput, inuit najugassaqarput pisariaqartikkunikku, akunnittarfimmullu pitsaalluinnartumut inissinneqarsiamvugut. Nuannersorujussuuvoq inuillu qasersaarluarput. Silagissioqaagullu, unamminissatsinnullu siullermut qilanaaqaagut, Tekle Ghebrelul oqarpoq.