Angutit nunanut allanut unammisartut Islandilialersut

Unammisartut ulluinnarni Danmarkimi arsartartut, sisamanngornermi unnukkut Islandimut tikissapput, unammisartullu Nunatsinniittut tallimanngornermi ullaakkut Islandimut tikissapput.

Unamminerit pingasut
Nunanut allanut unammisartut Islandimiinnerminni pingasoriarlutik unammissapput. Unammiartullu sungiusarlutik ataatsimoornerminni saniatigut aamma sungiusaqatigiittassapput.

Unamminerit taakku pingasut TM Hôllinimi Reykjavikimi pissapput. Unamminerit marluk siulliit Islandimiut nunanut allanut unammisartuisa B-holdiinuussapput. Tallimanngornermi nalunaaqutaq Islandip nalunaaqutaa malillugu 20.00 aamma arfininngornermi nalunaaqutaq 18.00.

Nunanut allanut unammisartut sapaammi itiaassapput, tassami sungiusarlutik klubbimut Stjarnanimut nalunaaqutaq 09.45 unammissapput.

Aajuku unammiartussat:
Islandimut unammiartussat 15-iupput, aqutsisullu pingasuupput.

• Frank Mikkelsen GOG
• Inuk Højgaard GSS
• Miki Duko Sørensen GSS
• Muusaraanguaq Ostermann Søholm FIF
• Minik Dahl Høegh Århus Håndbold
• Aqqalu Ingemann Randers HH
• Milan Olsen GOG
• Nuka Heilmann GSS
• Akutaaneq Kreutzmann Ribe Esbjerg HH
• Lars Ole Lyberth GSS
• Angutimmarik Kreutzmann Randers HH
• Lars Møller N-48
• Inuujuk Ostermann Søholm Norsaq HC
• Gustav Ostermann Egede NÛK
• Aqqaluk M. Lings GSS

• Niels Møller sungiusaasoq

• Rasmus Larsen pisortaq

• Berit Duus timimik sungiusaasoq

• Miki Heilmann peqataasinnaanani nalunaarpoq

VM-mut anngutinngitsoortut
Amerikap nunavittaani pissartanngorniunnermi kingullermi, juunimi Argentinami pisuma, Kalaallit Nunaat nunarsuarmi pissartanngorniunnissamut, pingasunngorpat Frankrigimi aallartittussamut sisamassaanik peqataanissamut periarfissaqaraluarpoq.

Iluatsingajakkaluarpoq. Kisianni tupaallatsitsilluni Argentinamut ajugaaneq naammanngilaq. Chilemut ajorsarneq aamma Chilep Argentinallu unamminerisa inernerata, Brasilia, Chile aamma Argentina Amerikap nunavittaaneersunit unammiartussanngiornerat kinguneraa. Brasilia ammaanersiornermi Frankrigimut unammissaaq, Argentinallu danskit ilimagineqarluartut uumisaarniarsarissavaat.

- Anngutingajavippugut, maannalu nunarsuarmi pissartanngorniunnerit pissanganartut malinnaaffigiinnartariaqarpagut, Danmarkilu tv-ip saavani isiginnaartunut piukkunneqarnerpaagunarput, Rasmus Larsen, Kalaallit Nunaanni Assammik Arsaattartut Kattuffianneersoq, Sermitsiaq.AG-mut oqarpoq.

- Nunarsuarmi pissartanngorniunnernut anngutinngitsooratta, Islandimiut marloriarlutik unammiumammatigut pitsaasuuvoq. Ataatsimoortarnissarput aamma sakkortuumik unammisarnissarput pingaaruteqarpoq, taanna nangilluni oqarpoq.

Tulliani Nuummi katersuunneq
Ulluni februaarip qulingannit 12-ata tungaanut Nuummi sungiusarluni katersuuttoqassaaq. Unammisartut Nunatsinni najugaqartuunerusut aggersarneqarput, ulluinnarnilu Danmarkimi unammisartut ataasiakkaat ilanngunneqarput.

Atuaruk: Minik Dahl Høegh nersorneqarluaqisoq