Angutit håndboldertartut landsholdi nukittorput

Suliassat annertuut sioqqullugit, aappaagu junimi De Panamerikanske Mesterskabinut Argentinami anngunnissaq neriuutigalugu, minnerunngitsumillu tamakku angunniunnerit 2018-mi Nuummi ingerlanneqarnissaannut sulissuteqarnermi, Nunatsinni Håndboldertartut Kattuffiata aamma sungiusaasut Niels Møllerip nunanut aallanut unammisartut nukittorsarniarlugit aalajangerput.

Siornatigut nunanut allanut unammisartuusimasoq, 100-t sinnerlugit landholdini unammeqataasimasoq aamma unammisartut kulturiannik naammatsisut annerit ilaat Rasmus Larsen unammisartunut ilannguppoq. Taanna januarimi landholdit Helsingørimi katersuunneranni siullermik peqataassaaq.

Atuaruk: Angutit håndboldertartut landsholdit toqqarneqarput

Tatiginninneq nuannaarutigaa
Rasmus Larsenip Sermitsiaq.AG-mik oqaloqatiginninnermini suliassanut aggersunut qilanaarnini isertuutinngilaa.

- Aperineqarnera nuannaarutigaara, annertuumillu misilittagaqarnera atorneqarsinnaammat. Ukiut 20-t sinnerlugit landsholdiniinnikuuvunga. Nunatsinni Danmarkimilu håndboldertarneq ilisimasaqarfigilluarpara. Aammalu nunanut allanut unammisartut De Panamerikanske Mesterskabini unammisakkagut ilisimasaqarfigilluarlugit, Rasmus Larsen ilaatigut oqarpoq.

Rasmus Larseni nunarsuarmi pissartanngorniunnernut pingasoriarluni peqataanikuuvoq aamma Amerika avannarlermi, qeqqani, kujallermilu unammisaqattaartarnikuulluni.

Unammisartut sulinerannut ataqqinninneq
- Nunanut allanut unammisartut suliniutigineqarnerannut annertuumik ataqqinnippunga. Ilisimasama ilai inuusuttunut unammisartunut nutaanunt ingerlateqqinnissai qilanaaraara, uangalu inuttut ineriartorninnut aamma iluaqutaassaaq.

- Nunanut allanut unammisarnerup tungaatigut misigisaqartitaasarnerpassuama ilaanut utimut akiliinissara qilanaaraara, Rasmus Larsen naggasiivoq.

Atuaruk: Nuummi håndboldernermik aaqqissuussaq annertooq

Uuma ataani assit marluk takukkit