naligiissitaaneq
Angutit gruppiinik pilersitsisoqassaaq
Namminersorlutik Oqartussat angutit oqaloqatigiittarfiannik pilersitsiniarput, tassani angutit inuttut ineriartorneq, suliffeqarneq, ilaqutariinni inuuneq, angutit arnallu suliassaat, atornerluineq, nakuusertarneq pissutsillu allat oqaloqatigiissutigisinnaassallugit
Namminersorlutik Oqartussat pilersaarutigaat 2016-imi ukiassakkut Kangerlussuarmi nuna tamakkerlugu isumasioqatigiissitsiniarluni. Tamatumani ilaatigut siunertaavoq Kalaallit Nunaat tamakkerlugu sumiiffinni angutit gruppiinik pilersitsinissaq, tassani angutit inuttut ineriartorneq, suliffeqarneq, ilaqutariinni inuuneq, angutit arnallu suliassaat, atornerluineq, nakuusertarneq pissutsillu allat oqaloqatigiissutigisinnaassallugit.
Taamatut suliniuteqartoqalerpoq maajip 20-anni Kalaallit Nunaanni Naligiissitaanerup Ulluanut atatillugu.
Angutit katataasarput
– Amerlasuut arajutsisarpaat angutit amerlavallaartut ineriartornermi katataasarnerat ilinniagaqaratik suliffeqaratillu, tamannalu peqatigalugu inuiaqatigiit sukkasuumik allanngoriartorfiupput nutaanik piumasaqaateqarfiulerlutik, Ilaqutariinnut, Naligiissitaanermut Isumaginninnermullu Naalakkersuisoq Martha Lund Olsen (S) Naalakkersuisut.gl naapertorlugu erseqqissaavoq.
Namminneq sassartarfiat
– Pitsaasuuvoq pingaaruteqarlunilu 2016-imi angutit atugassarisaat pillugit oqallinnermi angutit akulerunnissaat saqqummiussisalerlutillu - namminneq sassartarfimmikkut. Taamaattumik sumiiffinni angutit gruppiinik pilersitsinissaq tapersersorparput, taanna oqarpoq.
Katsorsarneqarnissamut neqeroorut
Ilaqutariinnut, Naligiissitaanermut Isumaginninnermullu Naalakkersuisoqarfiup aamma sulissutigaa angutinut persuttaasartunut katsorsarneqarnissamik neqerooruteqalernissaq.