futsal

Angutit futsalertartut UEFA-mi unammiuaarnermut peqataalersut

Angutit futsalimi nunanut allanut unammisartut nunat tamalaat Tjekkietimi unammiuaarnerannut peqataassapput.

Sverigemi decembarimi kalaallit angutit futsalertartut Nordi Cupimi arsarluarlutik takutitsilluaramik, kingorna nunanit Europami arsaattartut kattuffissuanit UEFA-mut ilaasortaasunit soqutineqalerput.

Tamannalu maanna Tjekkietimi Generali Cupimi marsip 18-anni aamma 19-anni peqataanissamut qaaqquneqarnerannik kinguneqartitsivoq. Taanna inuusuttunut nunanut allanut unammisartunut unammiuaarneruvoq, ukiunilu 23-ni ingerlanneqartareerpoq, UEFA-milu ilaasortanut naatsorsuussaagaluarluni.

- Periarfissaq tamanna takkummat siulersuisut nuannaarutigaat. Generali Futsal Cupimi peqataaneq kattuffimmi UEFA-mi ilaasortanit Kalaallit Nunaata arsaattartoqarfiuneranik nassuerutiginninneruvoq, GBU-mi siulittaasoq John Thorsen tusagassiuutinut nalunaarummi allappoq.

Atuaruk: Sungiusaasoq: Nordic Cup-imit ilikkagaqarluarpugut

Sungiusaasut Tekle Ghebrelulip aamma René Olsenip unammiaqataasinnaasut 34-it toqqarpaat, taakku kingorna 16-inut ikilisinneqassapput. Taakku inuusuttut sukataarlutik sungiusarnissaat pingaartippaat, tassa imaappoq sapaatip-akunneranut tallimariarlutik arfinileriarlutilluunniit.

16-it unammiartussat inuusuttut nunanut allanut unammisartut Tjekkiameersut, Slovakiameersut, Ungarnimeersut kiisalu Tjekkiami klubbini unammisartut unammissavaat.

Powered by Labrador CMS