Thursday, January 11, 2018 - 11:11

Angutit assammik arsaattartut Savalimmiuni unammineq siulleq ajugaaffigaat

Angutimmarik Kreutzmann arfineq-marlunnik isertitaqarluni kalaallini isertaqarnersaavoq (assi toqqorsivimmit)
Assi.: Knud Fl. Larsen
Kalaallit nunanut allanut unammisartuisa, peqatigiiffik Neistin, Savalimmiuni assammik arsaattartut liga-anni pitsaanertut inissisimasut ajorsartippaat

Kalaallit angutit assammik arsaallutik nunanut allanut unammisartut pingasunngormat Savalimmiuni sungiusarlutik katersuunnerminni siullermeerutaasumik unammipput.

Tassani unammineqarpoq Neistin Thorshavniminngaanneersoq, Savalimmiuni assammik arsaattartut liga-anni pitsaanertut inissisimasut.

Kalaallit nunanut allanut unammisartui muminnermi 8-10-mi kinguaqqallutik aallartinnerliorput. Muminnerup kingora nunanut allanut sungiusaasoq Ingi Olsen illersuisartunik saassussisartunillu allanngortitserivoq, tamannalu kalaallit unamminerinut iluaqutaalluarpoq.

Atuaruk: Assammik arsaattartut Savalimmiuni sungiusarput

Isertitat arfinillit ajugaassutaasut

Unamminerup naammassinerani kalaallit nunanut allanut unammisartui 24-18-mik ajugaapput.

- Aallartinnerliorsinnarluta illersuilluarnikkut isertitseriaasartui akiulersimavagut unammisagulli kukkusaartilerlugit – illersuilluarnikkulli aamma målinik paarsisut taamatuttaaq arlalinnik annaassisaqattaarsimallutik, tamanna iluaqutigalugu unammineq ajugaaffigaarput, nunanut allanut unammisartunut sungiusaasoq Ingi Olsen tusagassiuutinut nalunaarummi oqarpoq.

Kalaaleq unammisartoq, Karl Frederik Frederiksen, illersuilluarnilu saassussilluaqattaarlunilu unammilluarsimasoq, Neistinilu unammisartuni paariniapiloorneqarsimasoq, paasissutissiarineqarpoq.

Angutit nunanut allanut unammisartut ullumi sisamanngornermi unammeqqissapput. Tassani unammiartortitat, H71 Savalimmiut liga-anni tullertut inissisimasut, unammissavaat

Unammineq nalunaaqutaq 19.30 Hoyyvik-imi ingerlanneqassaaq.

  • Unamminermi kalaallisut isertitsisut:
  • Angutimmarik Kreutzmann isertitat arfineq-marluk
  • Inuujuk O. Søholm isertitat sisamat
  • Lars Møller isertitat pingasut
  • Karl Frederik Frederiksen isertitat marluk
  • Eqalunnguaq Kristiansen isertitat marluk
  • Miki Heilmann isertitat marluk
  • Aqqa Lings isertitaq ataaseq
  • Aqqaluk Ingemann isertitaq ataaseq
  • Milan Olsen isertitaq ataaseq
  • Gustav O. Egede isertitaq ataaseq
Seneste nyheder / Nutaarsiassat kingulliit