Friday, January 12, 2018 - 13:44

Angutit assammik arsaattartut savalimmiuni peqatigiiffimmut naligiittut

Miki Heilmann arfinileraarluni kalaallini isertitaqarnersaavoq (assi toqqorsivimmit)
Assi.: Grønlands Håndbold Forbund
Kalaallit angutit assammik arsaallutik unammisartut sisamanngormat Savalimmiuni aappassaanik unammipput

Kalaallit angutit nunanut allanut unammisartui aamma H71-llu – savalimmiuni hånboldligami aappaattut inissisimasut – unamminerat naammassimmat 21-21-mik naligiiffiuvoq.

Angutit nunanut allanut Savalimmiuni sungiusariartorneranni unamminerini tulliuvoq.

Kalaallit Nunaanni Assammik Arsaattartut Kattuffiata tusagassiuutinut nalunaarummi paasissutissiaraa, pingasunngormat siullermeerutaasumiik unamminermiit timikkut ilungersorfiunerusimasoq.

Atuaruk: Angutit assammik arsaattartut Savalimmiuni unammineq siulleq ajugaaffigaat

Timikkut unammineq

Nunanut allanut unammisartunut sungisaasup Ingi Olsenip timikkut unammisimaneq nuannaarutigaa.

- Unamminermi timikkut unammiffiunera naammagisimaarpara, tamannami Amerikami nunavittaaneersut pissartanngorniutivinnissaannut pisariaqartipparput. Taamatuttaaq saassusseriaaserput Miki Heilmannip unammilluaqaluni aqutsilluarnera naammagisimaarpara. Titarnerup killigata tungaanut saassussinerup pitsaalluinnartumillu unamminermi sukataarneerup unammisatta illersuisuinik puullaaqititsivoq, taanna tusagasssiuutinut nalunaarummi oqarpoq.

Kalaallit Nunaat unillatsiarnermi 12-11-mik siuaqqasimavoq unamminerullu naammassinerani 21-21-mik naligiiffiulluni.

Kalaallit isertitaqartut ukuupput:

  • Miki Heilmann isertitat arfinillit
  • Eqalunnguaq Kristiansen isertitat sisamat
  • Karl Frederik Frederiksen isertitat sisamat
  • Aqqaluk Ingemann isertitat pingasut
  • Inuujuk O. Søholm isertitat marlukj
  • Lars Møller isertitaq ataaseq
  • Nuka Heilmann isertitaq ataaseq

Kalaallit nunanut allanut unammisartut Savalimmiuniinnerminni naggataarutaasumik arfininngorpat unammissapput. Tassani VÍF unammissavaat, unamminerlu nalunaaqutaq 14.00 aallartissaaq.

Seneste nyheder / Nutaarsiassat kingulliit