Angutit arsaattartut aalajangiisussamik unammilersut

Kalaallit angutit isikkammik arsaattartut nunanut allanut unammisartui ullumi marlunngornermi aalajangiisussamik unammissapput, taakku ulluni makkunani Gotlandimi Island Gamesimut peqataapput.

Unammisarut ataasinngornermi Fröyamut unammigamik 2-2-rput, Malik Juhl aamma Norsaq Mathæussen isertitsisuullutik.

Ullumi marlunngornermi Gotland unammissavaat, taakku unamminerni marlunni siuliini akeqqatik ajugaaffigerujussuarpaat.

Kalaallit Nunaat semifinalimut ingerlaqqinniaruni ajugaasariaqarpoq, unammineq Nunatsinni nalunaaqutaq malillugu 13.00 aallartissaaq.

Arnat arsaattartut marlunngornermi aappassaanik ajorsarnermi kingorna Island Gamesimi semifinalernissaminnut periarfissaqarunnaareerput. Taakku ataasinngornermi Menorcamut 1-2-mik ajorsarput, marlunngornermilu Hitramut unammissapput.

Ataasiakkaarluni sikkilerneq
Ataasiakkaarluni sikkilernermi kalaallimik siullermeerluni ataasinngormat peqataaqqaartoqarpoq. Tassani Christian Keldsen peqataavoq, taanna sapaatiummat triatlonimi aamma peqataavoq.

Christian Keldsen sikkilernermi peqataasut apuuttunit 55-iusunit 36-iulluni apuuppoq. Aqqutaa 37 kilometerisut takissuseqarpoq, minutsit 54-t sekundillu 59-t tassani atorpai.

Kalaallit arnat marluk 10.000 meterimut arpannermi peqataapput. Kista Hammeken arfineq-pingajuattut apuuppoq, minutsit 40-t sekundillu 35-t atorlugit, Ukaleq Slettemarkip minutsit 40-t sekundillu 59-t atorlugit apuuppoq, tassanilu qulingiluaattut apuuppoq.

Arnat volleyballertartut ataasinngornermi unamminngillat, ullumikkullu marlunngornermi marloriarlutik unamissapput. Angutit ataasinngornermi unammigamik 0-3-mik Savalimmiunut ajorsarput.