Sisimiut
Angutip piniariartilluni ajunaarsimanissaa ilimagineqartoq
Angutip Sisimiuneersup 58-inik ukiullip piniariartilluni ajunaarsimanissaa ilimagineqarpoq. Angut piniaqatinilu angallatigisaminnik pitussiniartilluni imaanut nakkarsimavoq tammarlunilu
Isortumut sapaatip akunnerani kingullermi sisamanngornermi piniariarneq alianartumik kinguneqarpoq. Angut 58-inik ukiulik, Isortumut pingasunngormalli piniariaqateqarluni aallarsimasoq, imaanut nakkarpoq tammarlunilu.
Taama Qeqqani Politiini politikommissæri, Johan Davidsen, tusagassiuutinut nalunaaruteqarpoq.
Sakkortuumik anorlileriataarpoq
Kingorna sakkortuumik anorlilerpoq, umiatsiatsiallu kisani kalilerlugu.
- Angutip 58-inik ukiullip umiatsiaq aalajangerniartillugu imaanut nakkarpoq tammarlunilu, Johan Davidsen allappoq.
Politiit angallataat Sisak IV politiinik qatserisartullu aqqartartuinik ilaasoqarluni ujaasiartortinneqarpoq, kisianni kangerluk taamaalinerani sikunissimavoq ujaasinerlu ajornakusoortilerlugu. Ujaasinerlu ingerlanneqaraluarpoq angut nassaarineqarani.
Taamaattumik politiit naatsorsuutigaat angutip 58-nik ukiullip ajunaarsimanissaa, taamaattumillu aamma ujaasineq unitsinneqarsimalluni.
Angutip 58-inik ukiullip ilaqutai kalerrinneqarsimapput.